ناوەندی تەشکیلاتی حیزبی دێموکراتی کوردستانی ئیران لە ڕاگەیەندراوێک دا بڵاوی کردۆتەوە کە ڕۆژی هەینی ١٦ی مانگی پووشپەڕ دوو پێشمەرگەیان بە ناوەکانی عادڵ موھاجیر ناسراو بە “سەرباز” و لوقمان ئاجی لە دەوروبەری “ھەڵشۆ”ی سەر بە شاری قەڵادزێی باشووری کوردستان لە لایەن تیرۆریستێکی سەر بە ڕژیمی ئیران تەقەیان لێکراوە و شەهید کراون.
ڕژیمی ئیران یەکەم جاری نییە کە دەستی بە خوێنی تێکۆشەرانی کورد سوور بووە بەڵکوو مێژوویەکی دوور و درێژی لە تیرۆر و پەروەردە و هەناردەکردنی تیرۆریسم لە ئاستی ناوچەیی و جیهانی دا هەیە و تا کاتێک ئەم ڕژیمە لە دەسەڵات دابێ تیرۆر و تیرۆریسم لە گەشەسەندن دا دەبێ و جیهان ڕووی ئارامی و ئاسایش بە خۆیەوە نابینێ.
ئێمە وەک بزووتنەوەی سەربەخۆییخوازانی کوردستان وێڕای مەحکووم کردنی تیرۆریسمی دەوڵەتیی ئێران، بە داخبوونی خۆمان لەوەی کە کورد بە دەستی کورد و بە فیتی داگیرکەران شەهید بکرێ دەردەبڕین و سەرەخۆشی لە حیزبی دێموکراتی کوردستانی ئێران و بنەماڵەی ئەم دوو تێکۆشەرە بە تایبەتی و خەڵکی کوردستان بە گشتی دەکەین و خۆمان بە شەریک و بەشداری ئەم خەمە دەزانین.
بزووتنەوەی سەربەخۆییخوازانی کوردستان
١٦ی پووشپەڕی ٢٧٢٣ی کوردی
٧ی جولای ٢٠٢٣ی زایینی
