هێرشی هاژەکیی ڕژیمی ئێران بۆ سەر هەولێر بە ئامانجی بەلاڕێدابردنی بیر و ڕای گشتیی ناوخۆیی، جیا لە سەرلێشێواوی، نیشانەیە بۆ دوایین ڕۆژەکانی تەمەنی ئەو ڕژیمە.
بە پێی هەواڵەکان درەنگانی ئەمشەو دووشەممە٢٥ی بەفرانباری ٢٧٢٣ی کوردی” ١٥ی ژانویەی ٢٠٢٤ی زایینی” ڕژیمی داگیرکەری ئێرانی، هەولێری پایتەختی باشووری کوردستانی هاژەک باران کرد و بە تا کاتی ئامادەکردنی ئەم ڕاگەیەندراوە چوار کەسی مەدەنی شەهید و پێنج کەسی تریش بریندار بوون.
سپای تیرۆریستی پاسدارانی ئێران لە ڕاگەیەندراوێکدا ئەم هێرشە تیرۆریستیەی وەئەستۆ گرتووە و ڕایگەیاندووە کە بە تۆڵەی کوشتارەکانی کرمان، ڕاسک و سووریە، بنکەکانی مووسادیان لە هەولێرمان کردۆتە ئامانج.
ڕژیمی ئێران کە لە گەڵ دوایین ڕۆژەکانی تەمەنی پڕ لە نەهامەتیی خۆی دەست و پەنجە نەرم دەکا، بە مەبەستی هەڵخەڵەتاندن و بەلاڕێدا بردنی بیروڕای بەشێک لە ئێرانیەکان، هەر جارەو بە سیناریۆیەکی دەستکردی وەک تەقینەوەکەی کرمان و بە دروستکردنی دوژمنێکی وەهمی و هەروەها بۆ چاوترسێن کردنی ناڕازیانی دەسەڵاتەکەی پەنا بۆ هەر چەشنە پیلانێک دەبا و بەم بیانوانە جیا لەوەی ڕۆڵەکانی نەتەوە غەیرە فارسەکانی وەک کورد و عەڕەب و بەلووچ لە سێدارە دەدا،هاوکات لە ڕێگەی هاژەک و مووشەکی دوورهاوێژەوە هێرش دەکاتە سەر خاکی باشووری کوردستان.
بزووتنەوەی سەربەخۆییخوازانی کوردستان وێڕای مەحکووم کردنی ئەم هێرشانەی ڕژیمی داگیرکەری ئێرانی، داوا لە کۆڕ و کۆمەڵگای جیهانی و نێودەوڵەتی دەکا کە لە بەرانبەر سەرەڕۆیی و دەستدرێژییەکانی ڕژیمی ئێران چیتر بێدەنگ نەبن.
حیزبووڵڵا، حەماس،حوسیەکانی یەمەن، داعش، قاعیدە، تاڵیبان و بوکووحەرام هەر هەموویان لە هێلکەی ماری تیرۆریسمی دەوڵەتیی ئێرانەوە ترووکاو و پەروەردە کراون و تا سەری مارەکە پان نەکرێتەوە، تیرۆریسمی نێودەوڵەتی کۆتایی پێ نایە.
بزووتنەوەی سەربەخۆییخوازانی کوردستان
٢٥ی بەفرانباری ٢٧٢٣ی کوردی
١٥ی ژانویەی ٢٠٢٤ی زایینی
