بە بۆنەی یادی ١٨ ساڵەی دامەزرانی پارتی سەربەستیی کوردستان، بزووتنەوەی سەربەخۆییخوازانی کوردستان پەیامێکی ئاراستەی سەرۆکایەتی و سەرکردایەتیی ئەم پارتە کرد کە دەقی پەیامەکە بەم چەشنەیە:
بەڕێز کاک عارف باوەجانی سەرۆکی پارتی سەربەستیی کوردستان
بەڕیزان ئەندامانی سەرکردایەتیی و ئەندامان و لایەنگرانی پارتی سەربەستیی کوردستان
سڵاو و ڕێز:
بە بۆنەی تێپەڕبوونی ١٨ ساڵ بە سەر تەمەنی پڕلە شکۆی پارتی سەربەستیی کوردستان کە بێوچان و بە بێ ماندوو بوون لە پێناو دەستەبەر بوونی سەربەستی و سەربەخۆیی کوردستاندا لە خەبات و تێکۆشان دابووە، گەرمترین پیرۆزباییتان ئاراستە دەکەین و سەربەرزی و سەرکەوتنی زیاترتان بۆ بە ئاوات دەخوازین.
نزیکەی دوو دەیە خەبات بۆ ڕزگاری و سەربەخۆیی کوردستان، جیا لەوەی فەخرێکی گەورەیە کە بە باڵای پارتی سەربەستی بڕاوە، بۆ جووڵانەوەی ڕزگاریخوازیی گەلی کورد بە تایبەتی لە ڕۆژهەڵاتی کوردستانیش جێگەی شانازییە.
بزووتنەوەی سەربەخۆییخوازانی کوردستان، وێڕای پیرۆزبایی ئەم یادە شکۆدارە،هیوادارە ساڵوەگەڕی یادی دامەزراندنی پارتی سەربەستیی کوردستان ببێتە هەوێنی قۆناغێکی نوێ لە خەباتی ڕزگاریخوازیی گەلی کورد لە ڕۆژهەڵاتی کوردستان بۆ پێکهێنانی ناوەندێک کە بتوانێ سەرجەم هێز و لایەنە سەربەخۆییخوازەکان لە ژێر پلاتفۆرمێکی هاوبەشی نەتەوەیی و نیشتمانی کۆ بکاتەوە.
پێویستە هەموومان وەک هێز و لایەنە سیاسیەکانی ڕۆژهەڵاتی کوردستان، بە ڕێکخستنی جیددیی ناوماڵی کورد، خۆمان بۆ قۆناغی هەستیار و چارەنووسسازی چاوەڕوانکراوی بەردەممان ئامادە بکەین.
بەرز و بەڕێز و پیرۆز بێ یادی ١٨ ساڵەی دامەزرانی پارتی سەربەستیی کوردستان
بزووتنەوەی سەربەخۆییخوازانی کوردستان
٢٦ی ڕێبەندانی ٢٧٢٣ی کوردی
١٥/٠٢/٢٠٢٤ ی زایینی
