دوکتور عەلی قلیچ کەسایەتیی نەتەوەیی، ڕووناکبیر و سیاسەتوانی کورد لە بێدەنگیدا کۆچی دوایی کرد.
ئەو بە لێکۆڵینەوە و نووسین و بەرهەمەکانی خزمەتێکی گەورەی بە دۆزی ڕەوای نەتەوەکەمان کرد.
وێڕای دەربڕینی خەم و پەژارە، سەرەخۆشی لە کورد و کوردستان بە گشتی و بنەماڵەی ئازیزی بە تایبەتی دەکەم و خۆم لەم خەم و پەژارەدا بە شەریک و بەشدار دەزانم ، ڕووحی شاد و یاد و ناوی بەرز و بەڕێز بێ.ئاشتیاکۆ پوورکەریم ، سەرۆکی بزووتنەوەی سەربەخۆییخوازانی کوردستان
٢ی خەرمانانی ٢٧٢٤ی کوردی
٢٣ی ئاگۆستی ٢٠٢٤ی زایینی
سەرچاوەکانی هەواڵ بەم چەشنە کۆچی دوایی پرۆفیسۆر و کەسایەتیی دیاری کورد (باکووری کوردستان)، عەلی قلیچیان، لە تەمەنی 79 ساڵیدا ڕاگەیاند:
ڕۆژی شەممە، 24-08-2024، ئاشتیاکۆ پوور کەریم، سەرۆکی هاوپەیمانیی سەربەخۆییخوازانی کوردستان HSK، هەواڵی کۆچی دوایی پرۆفیسۆر عەلی قلیچ-ی پشتڕاستکردەوە و رایگەیاند، رۆژی 19ـی ئابی2024 لە فەرەنسا کۆچی دوایی کردووە و ئەمڕۆ لە رێوڕەسمێکدا هەر لەو وڵاتە بەخاکسپێردراوە.
پرۆفیسۆر عەلی قلیچ، ساڵی 1945 لە دێرسیمی باکووری کوردستان لەدایکبووە. دکتۆرای فەلسەفەی لە فەڕەنسا بەدەستهێناوە، بەشێوەی زانستی شارەزایی لە هەموو شێوەزارەکانی کوردیدا هەبووە و زمانەکانی فەرەنسی، ئینگلیزی و تورکیشی بە باشی زانیوە.
قلیچ، دامەزرێنەی ناوەندی لێکۆڵینەوەی زانستیی کوردستان بوو لە فەڕەنسا، کە تێیدا مێژووی کوردی پاراستووە.
ئاشتیاکۆ پوور کەریم دەڵێت: ” هەر بەڵگەیەک لەسەر پەیمانی سیڤەر بڵاوبووەتەوە ئەو لە ئەرشیڤی فەرەنسا دەریهێناوە، تەواوی نامەکانی سەید رەزای دێرسیمی لە ئەرشیڤی فەرەنسا دەرهێناون، هەروەها لە دۆسیەی هەڵەبجە دا یەکەم کەس بووە کە کاریگەری هەبوو لە بەجیهانیکردن و دەرهێنانی بەڵگەکان بۆ بە جینۆساید ناساندنی تاوانەکە.”
