پاش ئەوەی کۆمەڵگای مەدەنی لە ناوخۆی ڕۆژهەڵاتی کوردستان و ڕێکخراوە مرۆیی و مەدەنیەکانی دەرەوەی وڵات ڕۆژی ٢٥ی خەرمانانیان وەک ڕۆژی مانگرتنی سەراسەری لە کوردستان ڕاگەیاند ، حیزب و هێز و لایەنە سیاسییە کورد و کوردستانیەکانیش پاڵپشتی و پشتیوانیی خۆیان بۆ ئەم مانگرتنە ڕاگەیاند، گەلی کورد لە ڕۆژهەڵاتی کوردستان جارێکی دیکە حەماسەی خوڵقاند.
ڕژیمی داگیرکەری ئیرانی سەڕەڕای میلیتاریزەکردن، داگیرکاری، زەبر و زەنگ، سێدارە و بەندیخانە، ئەمڕۆ ٢٥ی خەرمانانی ٢٧٢٤ی کوردی نەیتوانی پێش بە ئیرادەی پۆڵایینی نەتەوەکەمان لە ڕۆژهەڵاتی کوردستان بۆ مانگرتنی سەرتاسەری لە دووهەمین ساڵوەگەڕی شۆڕشی ژینا دا بگرێ و گەلەکەمان بە سەرکەوتوویی مانگرتنی گشتی بەڕیوە برد.
مانگرتنی گشتیی ڕۆژهەڵاتی کوردستان جیا لە چەندین پەیامی گرینگ،هەڵگری مانیفێستێک بوو: مانفێستی سەربەخۆیی بۆ کوردستان.
مانگرتنی گشتی، سەراسەری و یەکگرتوانەی ڕۆژهەڵاتی کوردستان، پەیامی یەکڕیزی، هاودەنگی و یەکگرتوویی بوو بۆ هێز و لایەنە سیاسیەکانی کوردستان.
هاوکات پەیامێک بوو بۆ هەموو ئێرانیەکان کە خاکی پیرۆزی کوردستان بۆ ئێوە دەکەینە گۆڕستان و داگیرکەردەبێ لە خاکی کوردستان بچێتە دەرەوە.
بزووتنەوەی سەربەخۆییخوازانی کوردستان وێڕای نوێکردنەوەی پەیمان لە گەڵ شەهیدان و گیانبەختکردوانی ڕێگەی ئازادی و سەربەخۆیی کوردستان، سپاس و دەستخۆشی و پێزانینی هەیە بۆ تاک بە تاکی ڕۆڵەکانی ڕۆژهەڵاتی کوردستان کە بوێرانە و بە سەربەرزیەوە ئەم مانگرتنە بەشکۆیەیان بەڕێوە برد.
سڵاو دەنێرین بۆ شەهیدان،خوڵقێنەران و درێژەپێدەرانی ڕێبازی شۆڕشی ژینا” ژن، ژیان، ئازادی” ئیرادەی پۆڵایین و لەشکاننەهاتووی گەلەکەمان لە ڕۆژهەڵاتی کوردستان.
سەردەکەوێ خەباتی ڕزگاریخوازانەی نەتەوەکەمان بۆ گەیشتن بە سەربەخۆیی و دامەزراندن و بنیاتنانی دەوڵەتی سەربەخۆی کوردستان.
بزووتنەوەی سەربەخۆییخوازانی کوردستان
٢٥ خەرمانانی ٢٧٢٤ی کوردی
١٥ی سێپتامبری ٢٠٢٤ی زایینی
