سەردار وەلەدبەیگی، ئەندامی ڕێبەریی بزووتنەوەی سەربەخۆییخوازانی کوردستان.
سروشتی زۆربەی شۆڕشەکان لە مێژوو دا بەم چەشنە بووە کە پاش سەرکەوتنی شۆڕشەکە، شەڕی ناوخۆیی “Sivil War” ڕوویداوە.
لە شۆڕشی ئەمجارەی سووریە و هاتنە ئارای گۆڕانکاریەکان و بە تایبەتی ڕووخانی ڕژیمی ئەسەد و بە دەستەوە گرتنی دەسەڵاتی دمشق لە لایەن چەند تاقم و گرووپەوە وا چاوەڕوان دەکرێ کە گرژی و ئاڵۆزی و شەڕی ناوخۆیی لە ناو ئەم گرووپانە دا بە زوویی ڕووبدا.
لەو ڕوانگەیەوە، ڕژیمی داگیرکەری تورکیە دەیهەوێ ئەم هەلە لە قازانج و بەرژەوەندیی خۆی دا بقۆزێتەوە و شەڕێک لە نێوان کورد و عەڕەب دروست بکا، تاکوو کورد لە ڕۆژاوا لاواز بێ و ئەویش بە ئاسانی لە ناوی ببات.
لەم هەلومەرجە هەستیارە دا پێویستە کورد بە هۆشیاریەوە مامەڵەکە لە گەڵ دۆخەکە بکا و بە گرتنە بەری سیاسەتێکی ژیرانە، یەکەم تا دەتوانێ هەم لە بواری سیاسی و هەم لە بواری نیزامی و لۆجستیکیەوە جێ پێی خۆی قایم و توند و تۆڵ بکا و دووهەم بە هەستکردن بە هێزی یەکڕیزی و یەکگرتوویی ، ناوماڵی کورد ڕێکبخات و ئیزن نەدا کەلێنی سیاسی بکەوێتە ناو ماڵی کورد.
بە گشتی کورد لە ئێستا دا پێویستە سەبری هەبێ و ئامادەکاری بکا بۆ ئەو کاتەی گرووپ و تاقمە ناکۆکەکانی دێمشق خۆ بە خۆ یەکتر لاواز دەکەن.
ڕەمزی سەرکەوتن لە هێز دایە و یەکڕیزی و یەکخستنی ناو ماڵی کورد، هێز بە ڕۆژاوا دەبەخشێ.
لەو کات و ساتەی بە سەر ڕۆژهەڵاتی ناڤین دا تێپەڕ دەبێ، هەم شکست و هەمیش سەرکەوتنی ڕۆژاوای کوردستان، کاریگەری لە سەر هەموو بەشەکانی کوردستان دەبێ.
لە ئەنجامدا سەرکەوتنی ڕۆژاوا دەتوانێ دەستکەوتێکی گرینگ و ئەرێنی بێ بۆ هەنگاونان بەرەوە سەربەخۆیی و بنیاتنانی دەوڵەتی سەربەخۆی کوردستان.
