“٤٦ ساڵ شەڕ بۆ ئاشتی کورد و تورکیە لە ١٩٧٨ تا ئەمڕۆ ٢٠٢٥”
زیندان وەک سەنگەری بەرگری لە نەتەوەیەک: ئۆجالان و ماندێلا
لە باکووری کوردستان، لە ماوەی سەد ساڵی ڕابردوودا، جیا لە ڕێبەران و کەسایەتیە گەورەکانی کورد، هەزاران کەس بە دەستی رژیمی داگیرکەری تورکیە گیانیان لێئەستێنداروە، زیندانی و ئەشکەنجە و سەدان گوند و ناوچەش وێران و خاپوور کراون.
بیری کەماڵیستی و فاشیسمی تورک، کوردیان وەک تورکی شاخاوی پێناسە دەکرد و باوەڕیان وابوو کوردی باش ئەوە کوردەیە کە مردووە.
تورکەکان بە هەموو توانایانەوە دژ بە دەوڵەت و نەتەوەی کورد بوون، بەڵام ڕەوشی ناوچەکە و ترس لە گؤڕانکاریی بنەڕەتی لە نەخشەی ڕۆژهەڵاتی ناڤین وایکردووە کە ئەردۆغان و دەوڵەت باخچەلیی تا سەر ئێسقان دژ بە کورد، باسی ئاشتی بێننەوە گۆڕێ و خومەینی ئاسا هەم جامی ژارەکە بخۆنەوە و هەمیش بڵێن: ئەو تورکەی کوردی خۆش نەوێ، تورک نییە .
پڕۆسەیەک کە تورکەکان تا ئێستا چەندین جار پێشێلیان کردووە و پێی پابەند نەبوون.
ئەوان بە خەیاڵی خاویان پێیان وابوو بە دەستبەسەرکردنی جەستەیی سەرۆک ئۆجالان دەتوانن، کۆتایی بە پرسی کورد بێنن، نەیانزانی ڕێبەر ئاپۆ ئێمرالی دەکاتە سەنگەری دانوستان و دەستکەوت بۆ پرسی کورد لە تورکیە.
پ*ەک*ەکە لە لایەک لە قەندیل و لە لایەکی ترەوە لە ڕۆژآوا دا وەک هێزێکی یەکلاکەرەوە کاریگەری لە سەر هاوکێشە و موعادلاتی ناوچەکە هەیە.
پڕۆسەی ئاشتی کە لە نێوان تورکیە،ئیمراڵی/قەندیل و بە ناوبژیوانیی چەند وڵات و لایەنی وەک بریتانیا،ئەمریکا، نۆڕوێژ و …بەڕێوە دەچێ، جیا لەوەی پێداگریە لە سەر گۆڕینی یاسای بنەڕەتی تورکیە و لێبوردنی گشتی و ئازادیی زیندانیانی کورد، ڕاگرتنی هێرشەکانی ڕژیمی تورکیە لە سەر ڕۆژآوا و باشووری کوردستان، گۆڕانکاریی بنەڕەتی لە هاوکێشە سیاسیەکانی ناوچەکە دا دروست دەبێ و لەم نێوە دا ڕژیمی ئێران لەم پڕۆسەیە نیگەرانە و هەموو هەوڵێکی دەخاتە گەڕ کە سەر نەگرێ، بۆیە، بە باوەڕی ئێمە، قەندیل بە گشتی بەم بڕیارە ڕازای نابێ، بەشێکی دەچێتە ناو پڕۆسەی ئاشتی و چەک دادەنێ و بەشێکی چەک دانانێ و لە ئەنجامدا بە سەر دوو بەرە یا دوو بەش دا دابەش دەبن.
لێدان، لاوازکردن و کۆتاییهێنان بە میحورەی موقاومەت “پرۆکسیەکانی ئیران: حەماس، حیزبوڵڵا، حوسیەکان و بە زوویی حەشدی شەعبی”، لابردن و ڕووخانی بەشار ئەسەد،هێنانە ئارای دیزاینی نوێ بۆ نەخشەی ڕۆژهەڵاتی ناوەڕاست و عەمەلیاتی کریدۆری داود بە مەبەستی تێکدانی هیلالی شیعیی ئیرانی و بە گشتی چنینی پازڵی پێشهات و ڕووداوەکانی ناوچەکە لە تەنیشت یەک دەمانگەیەننە یەک ئەنجام:
تارگێت ئێرانە.
تێبینیەک: بەو مێژوویەی کە داگیرکەران بە نیسبەت نەتەوەی کوردەوە هەیانە، باوەڕمان بە هیچ داگیرکەرێکی کوردستان نییە و جیا لە خواستی سەربەخۆیی و دامەزرانی دەوڵەتی سەربەخۆی کوردستان، هیچ کام لە ڕێگاکانی پێشنیار کراو لە فیدراڵیەوە بگرە تا کۆنفیدراڵی و خودموختاری بۆ نەتەوەی کورد بە گونجاو نازانین، لە ڕەوشەکە نیگەرانین، بەڵام بە داهاتووەکەی خۆش بینین و خوێندنەوەمان بۆ ئەم ڕەوشەی ئێستای تورکیە تۆزێک جیاوازترە و داهاتوویەکی جیاواز و ڕوونی بۆ کورد تێدا بەدی دەکەین و ئەمە سەرەتایەکە.
چەک دانانی پەکەکە ئاوا بە ئاسانی ناچێتە قۆناغی جێبەجێکردنەوە و بێگومان دەبێ ڕژیمی تورکیەش هەنگاو باوێ و حوسنی نییەتی خۆی نیشان بدا.
لە کۆتاییدا ئەگەر وەک ئاشبەتاڵیش چاوی لێبکرێ، لە پێناو پاراستنی ڕۆژاوای کوردستان، وەک ئەوەی کاتی خۆی حیزبی دێموکراتی کوردستانی ئێران و کۆمەڵەی زەحمەتکێشانی کوردستانی ئێران وتیان لە پێناو پاراستنی بەرژەوەندییەکانی باشووری کوردستان و ڕەوشی هەستیاری کوردستان، کۆتاییمان بە شەڕ لە گەڵ ئێران هێناوە، دیسانیش جێگەی ڕەخنە نییە.
دەقی پەیامەکەی بەڕێز عەبدوڵڵا ئۆجالان لە ئیمرالیەوە:
تا وەک ئەو کۆمەڵگە و پارتە هاوچەرخانەی بەزۆرەملێ کۆتاییان پێ نەهێنراوە، ئێوەش دڵخوازانە کۆنگرەیەک ببەستن و بڕیار بدەن؛ پێویستە هەمووتان کۆببنەوە و چەکەکانتان دابنێن و پەکەکە خۆی هەڵبوەشێنێتەوە. سڵاو لە هەموو ئەو کەسانە دەکەم کە باوەڕیان بە پێکەوەژیانە و گوێ لە بانگەوازەکەم دەگرن.
