پەیامی پیرۆزبایی :
بەڕێز جەنابی دوکتور بەرهەم ساڵح
سەرۆکی کۆمیساریای باڵای پەنابەرانی نەتەوە یەکگرتووەکان (UNHCR)
بە بۆنەی دەستبەکاربوونتان وەک کۆمیساری باڵای پەنابەرانی نەتەوە یەکگرتووەکان،لە لایەن خۆم و بزووتنەوەی سەربەخۆییخوازانی کوردستان گەرمترین پیرۆزباییتان لێدەکەم، دەستنیشانکرانی جەنابتان لەم پۆستە گرینگە دا و لە گرینگترین ساتەکانی مێژووی هاوچەرخدا، ڕەنگدانەوەی متمانەی کۆمەڵگەی نێودەوڵەتییە بە ئەزموون و لێهاتوویی و هەستی بەرپرسیارێتی ئێوە لە ڕووبەڕووبوونەوەی قەیرانی ئاوارەبوونی جیهانی کە لە پەرەسەندندایە.
ئێوە ئەم بەرپرسیارێتییە گرینگە لە سەردەمێکدا دەگرنە ئەستۆ کە بە هۆی شەڕ و سەرکوت و داگیرکاری و ڕەتکردنەوەی مافە بنەڕەتییەکانەوە ملیۆنان کەس بە زۆر لە ماڵ و زێدی خۆیان بە ناچاری ڕایان کردووە و یان دەرکراون.
سەرکردایەتیکردنی یەکێک لە گرنگترین دامەزراوە مرۆییەکانی جیهان لەم بارودۆخانەدا پێویستی بە تێگەیشتنێک هەیە کە ڕەگ و ڕیشەی لە هۆشیاری مێژوویی، تێڕوانینی سیاسی و پابەندبوونی ڕاستەقینەی بەڕێزتان بە کەرامەتی مرۆڤەوە هەیە.
بوونی کەسایەتییەکی کورد لە سەرۆکایەتی کۆمیساریای باڵای پەنابەرانی نەتەوە یەکگرتووەکان هەم گرنگییەکی ڕەمزی و هەم گرنگیی جەوهەری لە خۆ گرتووە. نەتەوەی کورد کە کەوتۆتە بەر پەلاماری داگیرکەران و ئاوارەیی و دەربەدەری و بێدەوڵەتی چێشتووە، بە باشی تێدەگا کە پەنابەری تەنیا پێگەیەکی یاسایی نییە، بەڵکو برینێکی قووڵی ئینسانی و دەستەجەمعییە.
لەم چوارچێوەیەدا، دامەزرانی جەنابتان لەم پێگەیە دا دەتوانێ ببێتە دەنگی بەهێزی ئەو ئەزموونە تاڵ و مێژووییانەی کە نەتەوەی کورد بە هۆی داگیرکەرانەوە تووشی هاتووە و ئێوە لەم پێگەیەوە وەک کەسێکی بەرپرسیار دەتوانن، هاواری ئاوارەیی و بێدەوڵەتیی نەتەوەی کورد بگەیەننە نەتەوە یەکگرتووەکان و کۆمەڵگای جیهانی.
هیوادارم لە ماوەی دەسەڵاتی بەڕیزتاندا، بنەماکانی بێلایەنی و دادپەروەری و لێپرسینەوە و پاراستنی پەنابەران و ئاوارەکان- بە تایبەتی ئەوانەی کە قوربانیی ململانێی درێژخایەن و سیاسەتی دوورخستنەوە و ئینکارن- زیاتر بەهێز بکرێ و لە ئاستی جیهانی دا بە جیددی کاریان بۆ بکرێ.
هیوای سەرکەوتنتان بۆ دەخوازم لە جێبەجێکردنی ئەم ئەرکە نێودەوڵەتییە گرنگە.
بە ڕێزەوە،
ئاشتیاکۆ پوورکەریم
سەرۆکی بزووتنەوەی سەربەخۆییخوازانی کوردستان
