بە بۆنەی جێژنی پیرۆزی قەوەڵتاس بەڕێز ئاشتیاکۆ پوورکەریم سەرۆکی بزووتنەوەی سەربەخۆییخوازانی کوردستان پەیامێکی پیرۆزبایی ڕوو بە پێڕەوانی ئایینی پیرۆزی یاری و گشت خەڵکی کوردستان بڵاو کردەوە ، لە بەشێک لە پەیامەکە دا هاتووە کە :
یارسانیەکان یەکێک لە بناغە سەرەکی و ڕەسەنەکانی کۆمەڵگای کوردستان و بەشێکی دانەبڕاون لە نەتەوەی کورد و کوردستان، ئەوان لە مێژوو دا بە بەڵگەوە سەلماندوویانە کە پارێزەری ئایین و خاک و ڕەسەنایەتیی زاگرۆس و کوردەوارین.
دەقی پەیامەکە بەم چەشنەیە:
خوشکان و برایانی یارسانی؛
بە بۆنەی جێژنی پیرۆزی قەوەڵتاس گەرمترین پیرۆزباییتان لێدەکەم و لە ناخی دڵمەوە پێتان دەڵێم “جەژنی سێ شەوەی یاران” لە هەموو ئێوە و گشت کوردستانیان لە هەر شوێنێکی ئەم جیهانەن پیرۆز بێ.
قەوەڵتاس تەنیا بۆنەیەکی ئایینی یان ڕووداوێکی ڕۆژژمێری نییە؛ بەڵکوو بەیاننامەیەکی مێژووییە لە مانەوەی شوناس و هۆویەتی نەتەوەی کورد، هێمایە بۆ ڕاستی و کەرامەتی مرۆڤایەتیی زاگرۆس، هێمای ئاشتیخوازیی نەتەوە و سەرزەمینێکە کە زیاتر لە یەک سەدەیە کەوتۆتە بەر شاڵاوی داگیرکەرانی “ئێران،عێڕاق،سووریە و تورکیە”.
یارسانیەکان یەکێک لە بناغە سەرەکی و ڕەسەنەکانی کۆمەڵگای کوردستان و بەشێکی دانەبڕاون لە نەتەوەی کورد و کوردستان، ئەوان لە مێژوو دا بە بەڵگەوە سەلماندوویانە کە پارێزەری ئایین و خاک و ڕەسەنایەتیی زاگرۆس و کوردەوارین.
ئەمڕۆکە، کوردستان لە ژێر گوشار و هەڕەشەی مەترسیداری داگیرکەران دایە:
داگیرکەر لە لایەک ئازادی، فرە چەشنی، ئایین، ناسنامە و شوناسی ئێمەی کورد بە تاوان دەزانێ؛ و لە لایەک هەوڵ دەدا بە توندئاژۆیی ئایینی و بە دروستکردنی ناکۆکی لە ناو ئایینەکانی تری ناو کوردستاندا هەم ئاژاوە دروست بکا و هەم لە ڕێگەی دووبەرەکی نانەوە درێژە بە داگیرکاریەکەی بدا.
لە وەها هەلومەرجێکدا، پەیامی قەوەڵتاس بۆ هەموومان ڕوون و بەرچاوە: کۆمەڵگایەک کە ڕێز لە فرەچەشنی خۆی نەگرێ؛ و نەتەوەیەک کە مافی یەکسان بۆ شارۆمەندانی دابین نەکا، داهاتووەکەی بە بارمتە گیراوە و ئازادی بۆ مسۆگەر نابێ.
لەم ڕوانگەوە، بە دەنگێکی زوڵاڵ و بەرز رایدەگەیەنم:
کوردستانی ئازاد و سەربەخۆی سبەینێ، دەبێ وڵاتی یاسا بێ ؛ وڵاتێک کە تێیدا هیچ شارۆمەندێکی کورد بە هۆی ناو و ئایین، زمان و زاراوە،جلوبەرگ و نەریت و کلتوورەکانی لە ئەمنیەت و دەرفەت و پێگەی یەکسان و بەرابەر بێبەش نەبێ.
لە کوردستانی ئازاد و سەربەخۆ دا، یارسانی نە «کەمینەی شیاوی پاڵپشتی»،بەڵکوو جیا لەوەی بە شێوەی فەرمی، خاوەن هەموو مافێکی سیاسی، فەرهەنگی، کۆمەڵایەتییە ،شەریک و هاوبەش و دامەزرێنەری دەوڵەت و خاک و کیانی سەربەخۆی کوردستانە و بەشدارە و بەشی سەرەکیە لە بنیاتنانی زاگرۆس و دەوڵەتی سەربەخۆی کوردستان.
ئەمەش ئەسڵە نە تەنیا لە چوارچێوەی دروشم دا:
- پارێزگاری و پاراستنی کردەیی لە گیان و ماڵ و شوێنە پیرۆزە ئایینیەکان و هەر کەسێک ببێتە هەڕەشە بۆ سەر ئەم ئایینە، دەکەوێتە بەر بەدواداچوون و لێپرسینەوە.
- بە فەرمی ناسین و داننان بە شوناس و هۆویەتی ئایینی و فەرهەنگی و دەستەبەرکردنی ئازادیی ئایینی، پەروەردە و ژیانی کۆمەڵایەتی.
- بەشداریی ڕاستەقینە لە دەسەڵات و حوکمڕانی لە چوارچێوەی دامەزراوە هەڵبژێردراوەکان و بە پێی سەروەریی یاسا.
بزووتنەوەی سەربەخۆییخوازانی کوردستان لەو باوەڕە دایە کە سەربەخۆیی،بێ مانا و ناتەواوە ئەگەر ئەنجامەکەی نەبێتە ئازادی و بەرابەریی گشتی.
ئێمە بۆ شەکانەوەی ئاڵایەک تێدەکۆشین کە لە ژێر سێبەری ئەم ئاڵایە، هەموو کۆمەڵگای کوردستان و نەتەوەی کورد بە گشتی بە هەموو پێکهاتەکانیەوە ” یارسانی،ئێزیدی،مەسیحی،موسڵمان،جوو و …” نەک لە پەراوێزدا، بەڵکوو لە چوارچێوەی یاسا و کەرامەتدا بژین؛ و کوردستان “ماڵێکی هاوبەشی ئەمن و ئەمان” بێ بۆ هەمووان.
لەم جەژنەدا دەستی ڕێز و هاوسۆزی و یەکڕیزی و یەکگرتووییتان بۆ درێژ دەکەم و دەڵێم: کوردستانێکی سەربەخۆ و ئازاد لەگەڵ ئێوەدا کامڵە و لە گەڵ ئێوە دا مانا دەگرێ ؛ ئەو داهاتووەی ئێمە پێکەوە بنیاتی دەنێین دەبێت شایەنی مێژوو و بیر و باوەڕ و قوربانیدانەکانی ئێوەی یارسانی بێ.
جێژنی پیرۆزی قەوەڵتاس پیرۆز و مبارەک بێ
هیوادارم ئەم سێ شەوە گەشاوەیە بەڵێنیی ڕۆژانی گەشاوەتر بێت بۆ هەموو کوردستان؛ ڕۆژێک کە هیچ باوەڕ و ناسنامەیەک ناچار نەبێ خۆی بشارێتەوە، و هیچ هاووڵاتییەک لە ترسی سبەینێدا نەژی، بە هیوای ئازادی و سەربەخۆیی بۆ کورد و کوردستان، کوردستانێک کە لە ئایینی یاری دا خاکەکەی بە پیرۆز ناسراوە و فەلسەفەی ئەم ئایینەش کورد بوون و کوردستانی بوونە و ڕێگە و ڕێبازی پیرۆزی ئایینەکەش خەباتە لە پێناوی سەربەخۆیی ئەم خاک و نیشتمانە دا.
ئاشتیاکۆ پوورکەریم
سەرۆکی بزووتنەوەی سەربەخۆییخوازانی کوردستان
