کوردناسیۆن: بە بۆنەی جەژنی نەتەوەیی نەورۆز بەڕێز ئاشتیاکۆ پوورکەریم، سکرتێری گشتیی پارتی سەربەخۆیی کوردستان، پەیامێکی پیرۆزبایی ئاراستەی گشت خەڵکی کوردستان کرد، دەقی پەیامەکە بەم چەشنەیە:
هاونیشتمانانی خۆشەویست،
نەتەوەی سەربەرزی کورد و خەڵکی خەباتکار و رزگاریخوازی کوردستان!
جارێکی تر نەورۆز هاتەوە ، نەک هەر وەک سەرەتای بەهار و ساڵێکی نوێ، بەڵکوو وەک نیشانەیەک کە ئێمە چووینەتە ناو قۆناغێکی چارەنووسسازەوە لە مێژووی ناوچەکە و خەباتی نەتەوەکەماندا . نەورۆزی ئەمساڵ پەیامێکی لە ناخی دا هەڵگرتووە کە سەرووترە لە هیوا و هومێد،پەیامێک لە گۆڕانکاریی گەورە و دووبارە پێناسەکردنەوە و سەر لە نوێ داڕشتنەوەی داهاتوومان .
نەورۆز بۆ نەتەوەی کورد ، ڕۆژێکی مێژوویی و پیرۆزە کە لە دڵی مێژووی خەبات و ئازادیخوازیدا ریشەی داکووتاوە. هەر بۆیە نەورۆز هەمیشە وەک ئاگری هیوای ئازادی و نیشانەی زیندووبوونی ڕووحی خەباتی نەتەوەی کورد بۆ رزگاری لە داگیرکاری دەمێنێتەوە.
هەر ساڵێک کە ئاگری نەورۆز لەسەر شاخ و گوند و شارەکانی کوردستان دەکرێتەوە، پەیامی یەکگرتوویی و هیوا و دڵخۆش بوون بە دواڕۆژی گەش بڵاو دەکاتەوە، پەیامی ئەوەی، نەتەوەیەک کە هەزاران ساڵ مێژوو و کولتووری خۆی پاراستبێت هەرگیز سەرەنجامی خۆی لەدەست نادات.
نەورۆزی ٢٧٢٦ی کوردیتان لێ پیرۆز بێ.
ڕۆژهه ڵاتی ناوه ڕاست لە ئیستا دا چووەته ناو قۆناخی گۆڕانکاریی بنه ڕه تیەوە، قۆناغێک که ده توانرێت ناوی بنێین “دیزاینکردنه وه ی ژیۆپۆلیتیکی ناوچه که “. کوردستان و ناوچەکە بەرەو نەزمێکی نوێی جیهانی هەنگاو داوێن، ئەو نەزمەی کە لە ماوەی سەدەی ڕابردوودا لەسەر بنەمای ڕێککەوتنی نێوان زلهێزە بیانی و جیهانیەکان و بەبێ ئیرادەی بەشی زۆری نەتەوەکان پێکهاتبوو، ئێستا خەریکە تێکدەڕووخێت.
ئەو سنوورانەی کە لەسەر بنەمای بەرژەوەندیی دەوڵەتە داگیرکەرەکان کێشراون، ئیتر ڕەنگدانەوەی واقیعە سیاسی و کولتووری و کۆمەڵایەتییەکان نین. لەم نێوەندەدا، ئێستا، ئەو نەتەوانەی ساڵانێکە لەژێر داگیرکاری و نکۆڵیکردن لە ناسنامە و چەوساندنەوەدان، بوونەتە ئەکتەرە سەرەکییەکانی ئەم گۆڕانکارییە.
نەتەوەی کورد بە پشت بەستن بە مێژوو و شوناس و خەباتی بەردەوامی خۆی، ئەمڕۆ لە ناخی ئەم پێشهات و گۆڕانکاریانە دایە. ئەمە دەرفەتێکی مێژووییە؛ دەرفەتێک بۆ چەسپاندنی پێگەی نەتەوەی کورد لە نەزمی نوێی ناوچەیی و گەیشتن بەو مافانەی کە زیاتر لە سەد ساڵە لێی زەوت کراوە.
ئەم گۆڕانکارییانە تەنها بۆ بەرژەوەندیی یەک نەتەوە نییە، بەڵکو دەکرێت سەرەتای نەزمێک بێت کە تێیدا هەموو نەتەوە ستەملێکراو و خاک داگیرکراوەکان- لە کوردەوە تا نەتەوەکانی دیکەی بێبەش لە مافی دیاریکردنی چارەنووس – شوێنی ڕاستەقینەی خۆیان وەربگرنەوە و بۆ خۆیان چارەنووسیان بە دەستی خۆیان بنووسنەوە.
لەم نێوەندەدا، ڕژیمی ئێران لە یەکێک لە خراپترین قۆناغەکانی مێژووی خۆیدایە. زنجیرەیەک قەیرانی هاوکات- ئابووری، کۆمەڵایەتی، سیاسی و نێودەوڵەتی و شەڕ بە توندیرین شێوە سیستمی ئەم ڕژیمەیان پاسیڤتر و ناسەقامگیرتر و بەرەو داڕووخانی یەکجارەکی بردووە.
شەڕی ئەمریکا و ئیسرائیل بە دژی ڕژیمی ئێران لە لایەک و ناڕەزایەتیی بەربڵاوی خەڵک لەو ڕژیمە و درز کەوتنە ناو پێکهاتەی دەسەڵاتی ئەو ڕژیمە لە لایەکی ترەوە ،ئاماژەن بۆ ئەوەی کە ئەم دەسەڵاتە بە تەواوی ڕەوایەیی و مەشڕووعیەتی خۆی لە ئاستی ناوخۆیی و نێونەتەوەیی دا بە تەواوی لە دەست داوە.
نەتەوەی کورد لە ڕۆژهەڵاتی کوردستان، کە سالانێکە بە دژی ئەم ڕژیمە داگیرکەرە خەباتی کردووە و لە ڕێگەی گەیشتن بە ئازادیدا گەلێک قوربانی داوە، ئێستا کە ئەم دەرفەتەی بۆ ڕەخساوە، پێویستە لە قازانج و بەرژەوەندیی نەتەوەکەمان و لە پێناو گەیشتن بە ئازادیدا بیقۆزینەوە.
ڕژیمی ئێران لە لێواری ڕووخان و گۆڕانکاریەکی گەورەی پێکهاتەیی و ژێئۆگرافیکی دایە، گۆڕانێک کە دەتوانێ ببێتە مایەی تێکڕمانی نەزم و سیستمی ئێستای دەسەڵاتی کۆماری ئیسلامیی ئێران.
ئەم دۆخە مێژوویەی ئێستا و ئەم هەلومەرجەی ڕەخساوە ئەگەر لە دەستی بدەین ڕەنگە بۆ سەد ساڵی تریش دووبارە نەبێتەوە بۆیە دۆخی ئێستا بەرپرسایەتیی گەورەمان دەخاتە ئەستۆ : ڕۆژهەڵاتی کوردستان دەتوانێ ببێتە داینەمۆ و هێزی بزوێنەر و یەکلاییکەرەوەی پێشهات و گۆڕانکارییەکانی ئێرانی ئێستا و ناوچەکە بە گشتی.
نەتەوەی کورد بۆ ئەم گۆڕانکاریانە ئامادەیە ، بەڵام ڕاستیەک کە نابێ لە بیری بکەین ئەوەیە کە پێویستیمان بە یەکڕیزی و یەکگرتوویی زیاتری هێز و لایەنە سیاسیەکان هەیە.
ئەمڕۆ یەکگرتوویی دروشم نییە- پێویستییەکی مێژوویی و حەیاتیە، یەکڕیزییەک لەسەر ئامانجە سەرەکییە نەتەوەیی و نیشتمانییەکان.
پێویستیمان بە :
- بەرەیەکی سیاسی و هێزێکی سازماندراوی هاوبەش
- ستراتیژییەکی هەماهەنگ
- و یەک دەنگ لەسەر ئاستی ناوخۆیی، ناوچەیی و جیهانی هەیە
هاوپیمانی چەند ڕێکخراوی سیاسی کوردستانی ئێران و یەکگرتنی پارتی سەربەخۆیی کوردستان و بزووتنەوەی سەربەخۆییخوازانی کوردستان هەنگاوێکی گرینگ و پڕمانایە و پێویستیەکی مێژوویی و هەنووکەییە و جیا لەوەی نیشانەی هەستکردنە بە بەرپرسیارێتی ، نێشان دەدا کە یەکگرتوویی و هاوکاری دەتوانێت هێزی نەتەوەی کورد زیاتر بکات و ڕێگای خەبات بۆ مافە نەتەوەییەکان ڕوونتر بکات. بۆیە پێویستە پەرە بەم یەکگرتووویی و هاوپەیمانێتیە بدرێ و ئەم پلاتفۆرمە بتوانێ هەموو هێزە کوردستانیەکان لە دەوری یەک کۆبکاتەوە ، یەکگرتوویی هەمیشە بنەمای سەرکەوتنە، و ئەم هەنگاوە هیوایەکی نوێ بۆ داهاتووی خەباتی خەڵکی کوردستان درووست دەکات.
ئەو جیهانە نوێیەی کە دروست دەبێت چیتر شوێنی بۆ نەتەوەی بێدەنگ نەماوە. ئەم دونیا نوێیە ئی ئەم نەتەوانەیە کە، وشیار و ئاگان، ڕێکخراو و مونسەجیمن، یەکگرتوو و یەکڕیزن.
ئێستا میللەتی کورد لە خاڵێکی چارەنووسساز و قۆناغیکی مێژووییدا وەستاوە کە دەتوانێ بۆ خۆی مێژووی خۆی سەر لە نوێ بنووسێتەوە.
ئێمە دەبێ ئەم دەرفەتە بکەینە پڕۆژەیەکی نەتەوەیی، هیوا و هومێدەکان بکەینە بەرنامە و خەباتمان بکەینە دەستکەوتی سیاسی.
لەو نەورۆزە دا ئێمە تەنیا جەژن ناگرین، بەڵکوو بڕیار دەدەین.
بڕیاری یەکگرتن و یەکێتی و یەکڕیزی
بڕیاری ڕێکخستن و هەماهەنگیی نێوخۆیی
بڕیار بۆ بنیاتنانی داهاتوویەک کە شیاوی نەتەوەی کورد بێ.
بڕیار بۆ بە دەستەوەگرتنی سەروەریی سیاسی و نەتەوەیی
بڕیار بۆ کۆتاییهێنان بە داگیرکەر و دامەزراندنی دەوڵەتی سەربەخۆی کوردستان
بە باوەڕ بە ئیرادەی نەتەوەکەمان و پشت بەستن بە مێژووی شکۆداری خەباتمان، جەخت لەوە دەکەینەوە:
داهاتوویەکی ئازاد و وڵاتێکی سەربەخۆ خەون نییە، بەڵکوو دەرئەنجامی یەکڕیزی و هۆشیاری و خەباتی ئامانجدارمانە.
جەژنی نەورۆزی کوردی ٢٧٢٦ لە هەموو خەڵکی کوردستان پیرۆز بێت
بە هیوای سبەینێیەکی گەش و کوردستانێکی ئازاد و سەربەخۆ
ئاشتیاکۆ پوورکەریم
سکرتێری گشتیی پارتی سەربەخۆیی کوردستان
