“ڕژیمێک کە لە لایەن ئەمریکا و ئیسرائیلەوە گەیەندراوەتە لێواری رووخان، مووشەکەکانی ئاراستەی باشووری کوردستان دەکات. ئەمە هێز نییە، بەڵکوو دانپێدانانە بە شکست، بێدەسەڵاتی و داڕووخان”.
هێرشە هاژەکیەکانی ڕژیمی ئێران بۆ سەر سەنگەرەکانی پێشمەرگە لە ناوچەی سۆران و شەهید بوونی ٦ پێشمەرگە و بریندار بوونی دەیان پێشمەرگەی تر، پێشێلکردنی ئاشکرای سەروەریی باشووری کوردستانە و بە توندی شەرمەزار و مەحکوومی دەکەین.
ئەم دەستدرێژییانە لە کاتێکدا ڕوودەدات کە ڕێژیمی ئێران، لە ئەنجامی قەیرانە قووڵەکانی ناوخۆیی و شکست و فشارە قورسەکانی ناوچەیی و جیهانی لە هەموو کاتێک زیاتر لە پێگەی لاوازیدایە. کۆماری ئیسلامی کە لەبەرامبەر ئەمەریکا و ئیسرائیلدا ڕووبەڕووی قەیران و بێدەسەڵاتی بووەتەوە، بە هێرشکردنە سەر باشووری کوردستان و هەڕەشەکردن لەو کەمپانەی کە بنەماڵەی حیزبەکانی ڕۆژهەڵاتی کوردستانی لە باشوور تێدا نیشتەجێن، هەوڵ دەدات وێنەیەکی ناڕاستیی هێز و خۆڕاگری لە خۆی نیشان بدات.
ڕاستیەکە ئەوەیە، بەم هێرشانە دەیهەوێت شکست و قەیرانەکانی لە ئاستی ناوخۆیی و جیهانیدا بشارێتەوە.
هێرشکردنە سەر باشووری کوردستان لە بەهێزی و بەدەسەڵاتی نییە، بەڵکوو نیشانەی شکستە یەک لە دوای یەکەکانیەتی و ماهیەتی دوژمنکارانەی ئەو ڕژیمەیە بەرانبەر بە کورد و کوردستان و مرۆڤایەتی .
ئێمە وەک پارتی سەربەخۆیی کوردستان، وێڕای ڕێزگرتن لە شەهیدانی ئەم هێرشە و هیوای زوو چاکبوونەوە بۆ بریندارەکان ، داوا لە نەتەوە یەکگرتووەکان و کۆمەڵگەی نێودەوڵەتی دەکەین کە لە بەرامبەر ئەو دەستدرێژییانە بێدەنگ نەبن و هەڵوێستێکی ڕوون و کردەیی بۆ ڕاگرتنی هێرشەکانی ڕێژیمی ئێران بگرنەبەر.
پارتی سەربەخۆیی کوردستان جەخت لەوە دەکاتەوە کە نەتەوەی کورد خەبات بۆ ڕزگاری و سەربەخۆیی کوردستان و بەرگری لە خاک و نەتەوە و کەرامەتی نەتەوەیی خۆی بە ئەرکی خۆی دەزانێت و پێویستە کەڵک لە هەر هەلێک وەرگرێت لە پێناو ڕزگاری و سەربەخۆیی کوردستان .
پارتی سەربەخۆیی کوردستان
٤ی خاکەلێوەی ٢٧٢٦ی کوردی
٢٤ی مارسی ٢٠٢٦ی زایینی
