پەیامی هاوخەمیی پارتی سەربەخۆیی کوردستان بۆ کۆمەڵەی زەحمەتکێشانی کوردستان

لە ئەنجامی هێرشی ڕژیمی ئێران ، پێشمەرگەیەکی کۆمەڵەی زەحمەتکێشانی کوردستان شەهید بوو.

لە درێژەی هێرش و دەستدرێژیەکانی ڕژیمی ئێران بۆ سەر بنکە و بارەگای حیزبەکانی ڕۆژهەڵاتی کوردستان، لە باشووری کوردستان، پێشمەرگەیەکی کۆمەڵەی زەحمەتکێشانی کوردستان بە ناوی غەزاڵ مەولان شەهید بوو.

ڕۆژی سێشەممە ٢٥ی خاکەلێوەی ٢٧٢٦ی کوردی ، ڕژیمی ئێران لە ڕێگەی هاژەک و درۆنەوە هێرشی کردە سەر کەمپەکانی سوورداشی کۆمەڵەی زەحمەتكێشان و ئازادیی حیزبی دێموکراتی کوردستانی ئێران و لە ئەنجامدا دوو پێشمەرگەی کۆمەڵەی زەحمەتکیشانی کوردستان برینداربوون و کچە پێشمەرگەیەکیش بە ناوی غەزاڵ مەولان گیانی پاکی پێشکەش بە بارەگای بەرزی ئازادی کرد و چووە ناو کاروانی شەهیدانی کوردستانەوە.

ئێمە وەک پارتی سەربەخۆیی کوردستان، وێڕای مەحکووم کردنی جینایەتەکانی ڕژیمی کۆماری ئیسلامیی ئێران، سەرەخۆشی لە بنەماڵە، هەڤاڵانی کۆمەڵە، و خەڵکی خەباتکاری کوردستان دەکەین و لەو باوەڕە داین کە نە زیندان و سێدارە، نە درۆن و مووشەک و تەیارە هەرگیز ئیرادەی نەتەوەی کورد بۆ ئازادی و کەرامەت و سەربەخۆیی ناشکێنن، بەڵکوو نەتەوەی کورد شێلگیرتر دەکات بۆ درێژەدان بە خەبات دژی داگیرکەرانی کوردستان.

جارێکی دیکە سەرەخۆشی لە کەس و کار و بنەماڵە و هاوسەنگەرانی هاوڕێ غەزاڵ دەکەین و خۆمان بە شەریک و بەشداری ئەم خەم و ئازارە دەزانین.

سەردەکەوێ خەباتی ڕزگاریخوازنەی نەتەوەی کورد بۆ ئازادی و سەربەخۆیی.

بەرز و بەڕێز بێ یادی شەهیدان و گیانبەختکردوانی ڕێگەی ئازادیی کورد و کوردستان.

پارتی سەربەخۆیی کوردستان

٢٥ی خاکەلێوەی ٢٧٢٦ی کوردی

١٤ی ئاپریلی ٢٠٢٦ی زایینی