پەیامی پیرۆزبایی پارتی سەربەخۆیی کوردستان بە بۆنەی یەکگرتنی یەکێتی شۆڕشگێڕانی کوردستان و ڕیکخراوی یاری کورد لەگەڵ کۆمەڵەی زەحمەتکێشانی کوردستان.

پارتی سەربەخۆیی کوردستان، یەکڕیزی و یەکگرتنی یەکێتی شۆڕشگێڕانی کوردستان و ڕێکخراوی یاری کورد لەگەڵ کۆمەڵەی زەحمەتکێشانی کوردستان، بە هەنگاوێکی ئەرێنی و بەرپرسیارانەی دەزانێت و ئەم هەنگاوە پیرۆزە لە ئاراستەی بەهێزکردنی ڕیزەکانی خەباتی نەتەوەیی و ڕزگاریخوازانەی نەتەوەی کورد هەڵدەسەنگێنێت.

لە هەلومەرجێکدا کە کوردستان و ناوچەکە لە قۆناغێکی هەستیار و چارەنووسسازی مێژوویی دایە، هەر کردەوە و هەنگاوێک بەرەو یەکدەنگی، یەکڕیزی و لێک نزیک بوونەوەی هێزە سیاسییە کوردستانیەکان، دەتوانێت یارمەتیدەر بێت بۆ پتەوکردنی بەرەی خەبات و بەهێزکردنی ئیرادەی نەتەوەیی نەتەوەی کورد.

ئێمە ئەم بڕیارە بە نیشانەی تێگەیشتنێکی دروست لە هەستکردن بە بەرپرسیارێتی مێژوویی و پێویستیی هاوکاریی هێزە سیاسیە کوردستانیەکان و وەڵامدانەوەیەک بۆ خواستی ڕەوای نەتەوەی کورد بۆ یەکڕیزی و یەکگرتوویی زیاتر دەزانین. بێ گومان لێک نزیکبوونەوە و هاوکاری نێوان هێزەکانی ناو جووڵانەوەی ڕزگاریخوازیی کوردستان لە پێداویستییە سەرەتاییەکانی ئەم قۆناغە هەستیارەیە.

پارتی سەربەخۆیی کوردستان وێڕای پیرۆزبایی ئەم هەنگاوە لە سەرکردایەتی و ئەندامان و لایەنگرانی کۆمەڵەی زەحمەتکێشانی کوردستان ، هیوادارە ئەم پرۆسەیە ببێتە ڕێگە خۆشکەر بۆ پتەوکردن و بەرفراوانکردنی هاوپەیمانیی هێزە سیاسیەکانی کوردستانی ئێران، بۆ ئەوەی لە ڕێگەی خەباتی هاوبەش و یەکگرتوانەوە بتوانین خەبات و تێکۆشانمان لە پێناو ئازادی، سەروەریی سیاسی و کەرامەتی مرۆڤایەتی و بەدیهێنانی مافە ڕەواکانی نەتەوەکەمان پتەوتر و بەهێزتر بکەین.

بژی یەکێتیی نەتەوەیی و یەکڕیزیی ناو ماڵی کورد

سەردەکەوێ خەباتی ڕزگاریخوازانەی نەتەوەکەمان بۆ گەیشتن بە ئازادی و سەربەخۆیی

پارتی سەربەخۆیی کوردستان

٢٧ی خاکەلێوەی ٢٧٢٦ی کوردی

١٦ی ئاپریلی ٢٠٢٦ی زایینی