بە بەشداریی هەیئەتێکی پارتی سەربەخۆیی کوردستان،یادی ئەنفال لە لەندەن کرایەوە .

کوردناسیۆن: رۆژی دووشەممە، ٣٠ـی خاکەلێوەی ٢٧٢٦ی کوردی” ٢٠ی ئاپریلی ٢٠٢٦ی زایینی” بە هەوڵی سەرباز بەرزنجی پارێزگاری پێشووی ناوچەی لامبێس ،لە شاری لەندەن ڕێوڕەسمێکی تایبەتی بە یادی ئەنفال لە ناوەندی پارێزگای ئەم شارە بەڕێوە چوو.

ئەم ڕێوڕەسمە بە ئامادەبوونی شاندێکی پارتی سەربەخۆیی کوردستان پێکهاتوو لە ئاشتیاکۆ پوورکەریم، سکرتێری گشتی و گۆران دەشتی ئەندامی دەفتەری سیاسیی پارتی و هەروەها  ژمارەیەکی بەرچاو لە بەرپرسانی سیاسی و حکوومیی بریتانیا، ئەندامانی پەرلەمانی بریتانیا، باڵوێزی عێراق لە لەندەن، نوێنەرایەتی حکومەتی هەرێمی کوردستان، بەرپرسی بەشی سیاسی لە کۆنسوڵخانەی بریتانیا لە هەولێر و بەرپرسی دیسکی هەرێمی کوردستان لە وەزارەتی دەرەوەی بریتانیا بەڕێوەچوو، کە تێیدا کەسایەتییەکانی کۆمەڵگای کوردی بریتانی بەشدارێکی کارای مەراسیمەکە بوون.

ئەم چالاکییە کە لە ژێر سێبەری مۆنۆمێنتی ئاشتی هەڵەبجە و ئەنفالدا بەڕێوەچوو؛  وەک بەشێک لە ستراتیژی لۆبیکردن بۆ چەسپاندنی مافە سیاسی و مرۆییەکانی نەتەوەی کورد لە ناوەندە بڕیاربەدەستەکانی جیهان ئەنجامدرا،

مۆنۆمێنتی ئاشتی هەڵەبجە و ئەنفال لە ماوەی ڕابردوودا بە هەول و تێکۆشانی سەرباز برزنجی بە یاسایی لە بینایەکی فەرمی حکوومەتی بریتانیا داندرا و وەک شانازییەکی مێژوویی پێشکەشی ڕۆحی پاکی قوربانیانی جینۆسایدی کورد کرا.

لەو مەراسیمە دا ، وێڕای بەرزڕاگرتنی یادی قوربانییان و ئەنجامدانی چەندین چالاکی جۆراوجۆر، ژمارەیەک دۆکیومێنتاری گرنگ نمایشکران. هاوکات، بەشێک لە ئامادەبووان، پەرلەمانتاران و نوێنەرانی سەرجەم لایەنە سیاسییەکانی بریتانیا وتاری تایبەتیان پێشکەش کرد.

لە تەوەرێکی تری مەراسیمەکەدا، بەڕێزەوە وتاری سەرکردە سیاسییەکانی هەر چوار پارچەی کوردستان خوێندرایەوە؛ تێیدا وێڕای دەربڕینی پێزانین بۆ ڕێکخستنی ئەم یادە پڕ شکۆیە، جەختیان لە گرنگیی بەرزڕاگرتنی ئەم بۆنانە کردەوە.

لە کۆتاییدا، ڕزگاربوویەکی کارەساتی هەڵەبجە وەک شایەتحاڵێکی زیندوو، چیرۆکی ژیانی خۆی و ڕەهەندە تراژیدییەکانی ئەو مەرگەساتەی بۆ ئامادەبووان گێڕایەوە.

لەو یادە دا سکرتێری گشتیی پارتی سەربەخۆیی کوردستان تاجە گوڵینەی پێشکەش بە مۆنۆمێنتی ئەنفال و هەڵەبجە کرد و هاوکات بانگهێشت کرا بۆ ئەوەی مۆمی ئەو یادە داگیرسێنێ.

دواتر پەیامی پارتی سەربەخۆیی کوردستان لە لایەن ئاشتیاکۆ پوورکەریم سکرتێری گشتیی پارتیەوە پێشکەش کرا کە دەقی پەیامەکە بەم چەشنەیە کە لێرە دا بە شێوەی ویدیویی بڵاوی دەکەینەوە.

بڵاوبوونەوەی وتاری سکرتێری گشتیی پارتی لە ڕووداو