کۆبوونەوەی پارتی سەربەخۆیی کوردستان و بەرەی دێموکراتیکی خەڵکی ئەحواز

ڕۆژی یەکشەممە ٣ی جۆزەردانی ٢٧٢٦ی کوردی “٢٤ی مەی ٢٠٢٦ی زایینی” دوو لایەنی پارتی سەربەخۆیی کوردستان و بەرەی دێموکراتیکی خەڵکی ئەحواز لە ئاستی بالای ڕێبەری دا کۆبوونەوە.

لە سەرەتای کۆبوونەوەکە دا بەڕێز ئاشتیاکۆ پوورکەریم سکرتێری گشتیی پارتی سەربەخۆیی کوردستان، ویرای باسکردن لە دۆخی ناوچەکە و پرسی گۆڕانکارییەکان لە نەخشەی ڕۆژهەڵاتی ناڤین و مەسەلەی نەتەوە بێدەوڵەت و خاک داگیرکراوەکانی وەک کورد، بەلووچ، عەڕەبی ئەحوازی، تورکی ئازەری،تورکمان و کاسپیەن، باسێکی تێر و تەسەلی لە پێوەندی بە  ئامانجی کۆبوونەوە پێشکەش کرد.

سکرتێری گشتیی پارتی سەربەخۆیی کوردستان وتی: ئامانجمان لەو کۆبوونەوەیە لێک نزیکبوونەوەی زیاتری هێز و لایەنە سەربەخۆییخوازەکانی سەر بە نەتەوەی غەیرە فارسەکانی خاک داگیرکراوی ناوی چوارچیوەی جوغرافیای دەستکرد و ساختەی ئێرانیە.

دواتر سکرتێری گشتیی بەرەی دێموکراتیکی خەڵکی ئەحواز، بەڕێز سەلاح ئەبوو شەریف وێڕای باسکردن لە پێویستیی لێک نزیکبوونەوە و هاوکاریی زیاتری نێوان هێز و لایەنەکانی سەر بە نەتەوە غەیرە فارسەکان، لە پێوەندی بە ڕەوشی ناوچەکە و شەڕی ئێران-ئەمریکا و ئیسرائیل  وتارێکی پێشکەش کرد.

سکرتێری گشتیی بەرەی دێموکراتیکی خەڵکی ئەحواز وتی: ئەم شەڕەی نێوان ئێران و ئامریکا و ئیسرائیل تەنیا شەڕی ئەمریکا و ئیسرائیل بە دژی ئێران نییە، بەڵکوو بەشێکە لە شەڕی ئێمەش بە دژی ڕژیمی ئێران و ئەوەی کە ئەوان توانیویانە خامنەیی و کاربەدەستانی باڵای ئەو ڕژیمە لە ناو بەرن لە قازانج و بەرژەوەندیی ئێمەش دایە.

لە درێژە دا هەیئەتی ڕێبەریی پارتی سەربەخۆیی کوردستان پێکهاتوو لە بەڕێزان: “ئاشتیاکۆ پوورکەریم، سکرتێری گشتی، سەلاح سوڵتانپەنا ئەندامی دەفتەری سیاسی و بەرپرسی پێوەندییە گشتیەکان، گۆران دەشتی ئەندامی دەفتەری سیاسی ، سیروان کەریمی ئەندامی کۆمیتەی ناوەندی” کۆمەڵێک باس و بابەتیان لە پێوندی بە ڕەوشی ناوچەکە، شەڕی ئێران ، ئامریکا و ئیسرائیل و ڕوانگەی پارتی سەربەخۆیی کوردستان لەو پێوەندییە دا هێنایە بەر باس و قسەیان لە سەر کرد.

هەروەها هەیئەتی ڕێبەریی بەرەی دێموکراتیکی خەڵکی ئەحواز پێکهاتوو لە بەڕێزان:

“سەلاح ئەبوو شەریف ئەحوازی، سکرتێری گشتی، دوکتور فەیسەل ئەحوازی وتە بێژی بەرە، تاهیر ئەبوونزال ئەحوازی ئەندامی دەفتەری سیاسی و بەرپرسی پێوەندییەکان لە گەڵ وڵاتانی عەڕەبی، تاهیر تەمیمی ئەندامی دەفتەری سیاسی و بەرپرسی پێوەندییەکانی بەرە لە گەڵ هێز و ڕێکخراوە ئەحوازیەکان، تۆفیق مەنسووری ئەندامی دەفتەری سیاسی و بەرپرسی پێوەندی لە گەڵ هێز و ڕێکخراوەکانی سەر بە نەتەوە خاک داگیرکراوەکان، نادر ئەحوازی بەرپرسی کارگێریی کۆمیتەی هاوئاهەنگی و تەشکیلاتی بەرە” کۆمەڵیک بابەت و پرسیاریان لە پێوەندی بە پارتی سەربەخۆیی کوردستان و پرسی نەتەوە خاک داگیرکراوەکان و ڕەوشی ناوچەکە هێنایە بەرباس کە لە لایەن سکرتێری گشتیی پارتی سەربەخۆیی کوردستان و سکرتێری گشتیی بەرەی دێموکراتیکی خەڵکی ئەحواز وەڵام درانەوە.

هەیئەتی ڕێبەریی هەر دوو لایەن وێڕای پێداگری لە درێژەدان بە پێوەندییەکان و پتەو کردنی پێوەندیی دوو لایەنە کۆمەڵێک پێشنیاری گرینگیان بۆ کاری هاوبەش هێنایە گۆڕێ کە بەشێکیان بریتی بوون لە:

• پێکهێنان و ڕێکخستنی کۆنفڕانسێکی هاوبەش بۆ سەرجەم نەتەوە خاک داگیرکراوەکانی ناو جوغڕافیای دەستکردی ئێرانی
• نووسین و واژۆ کردنی لێک تێگەیشتنێکی هاوکاریی دوولایەنە
• پەرە پێدان بە پێوەندییەکان و هاوکاریی دوو لایەنە بۆ ڕێکخستن و بەشدارکردنی هەر دوو لایەن لە کۆبوونەوە نێونەتەوەیی، کۆنفرانس، سمینار و …