پاریس:دیداری سکرتێری گشتیی پارتی سەربەخۆیی کوردستان لە گەڵ نوێنەری حکوومەتی هەرێمی کوردستان لە فەڕانسە

کوردناسیۆن: ڕۆژی دوو شەممە ٢٥ی جۆزەردانی ٢٧٢٦ ی کوردی” ١٥ی ژوئەنی ٢٠٢٦ی زایینی” سکرتێری گشتیی پارتی سەربەخۆیی کوردستان، بەڕێز ئاشتیاکۆ پوورکەریم سەردانی نوێنەرایەتیی هەرێمی کوردستانی لە فەڕانسە کرد و لە لایەن بەرپرسی نوێنەرایەتی بەڕێز عەلی دۆڵەمەڕی پێشوازی لێکرا.

لەو دیدراە دا کۆمەڵێک باس و بابەتی  پێوەندیدار بە ڕەوشی کوردستان، ئاڵۆزییەکان و شەڕ لە ناوچەکە و ڕەوشی هێز و لایەنە کوردستانیەکانی هەر چوار پارچەی کوردستان خرانە بەر باس و لێکدانەوە .

هەروەها باسێک لە  یەکبوونی دوو لایەنی بزووتنەوەی سەربەخۆییخوازانی کوردستان و پارتی سەربەخۆیی کوردستان کرا و ڕوانینی بەڕیز دۆڵەمەری لەو پێوەندییە دا پۆزەتیڤ  بوو و بە هەنگاوێکی گرینگ و پربایەخی وەسف کرد.

لە درێژە دا هەر دوو لا پێداگریان لە سەر پیوەندییەکانی نێوان حکوومەتی هەرێمی کوردستان و هێز و لایەنە سیاسیەکانی پارچەکانی دیکەی کوردستان کرد و لەو پێوەندییە دا سکرتێری گشتیی پارتی سەربەخۆیی کوردستان گوتی: چارەنووسی ئێمەی نەتەوەی کورد لە هەر چوار پارچەی کوردستان پێکەوە گرێدراوە و لێک جیا نییە، وەک چون هەر دەستکەوتێک لە باشووری کوردستان یا ڕۆژاوای کوردستان، لە قازانج و بەرژەوەندیی پارچەکانی تری کوردستان دایە، دەستکەوتەکانی ڕۆژهەڵات یا باکووری کوردستان ڕاستەوخۆ کاریگەری لە سەر پارچەکانی تری کوردستان دەبێ و بۆیە پێویستە ڕووحیەتی یەکگرتوویی و هاوکاریی نێوان هێز و لایەنەکان زیاتر پەرە بستێنێ و بۆ یەکڕیزیی ناو ماڵی کورد خەبات و تێکۆشانمان هاوئاهەنگ بکەین.

لە کۆتاییدا  پرسی سەربەخۆیی و خواستی نەتەوەی کورد و گۆڕانکارییە خێراکانی ڕۆژهەڵاتی ناوەڕاست و گۆڕینی بنەڕەتی لە نەخشەی سیاسیی ڕۆژهەڵاتی ناڤین  خرانە بەر باس و لێکدانەوە.