بەشداریی هەیئەتێکی پارتی سەربەخۆیی کوردستان لە کۆبوونەوەی پارلمانی بریتانیا بە بەشداریی لایەنە سیاسیەکانی کورد،بەلووچ، ئەحوازی

کوردناسیۆن: ڕێکخراوی دۆستایەتیی کورد و جوو  لە بریتانیا کۆبوونەوەیەکی بۆ هاوپەیمانیی حیزبەکانی کوردستانی ئێران لە پارلمانی بریتانیا ڕێکخست.

ڕۆژی دووشەممە، ١ی پووشپەڕی ٢٧٢٦ی کوردی، ٢٢ی ژوئەنی ٢٠٢٦ی زایینی  لە پەرلەمانی بریتانیا، گروپی پەرلەمانیی هەموو پارتەکان بۆ ڕۆژهەڵاتی کوردستان (APPG) بە هاوکاریی  ڕێکخراوی دۆستایەتیی کورد و جوو  کۆبوونەوەیەکی تایبەتی بۆ نوێنەرانی حیزبەکانی هاوپەیمانیی کوردستانی ئێران ڕێکخست.

کۆبوونەوەکە بە سەرپەرشتیی هەردوو پەرلەمانتار، جۆن سلینگەر و ماری گلیندۆن، ئەندامانی گروپی دۆستایەتی پەرلەمانتاران بۆ ڕۆژهەڵاتی کوردستان، بەڕێوەچوو.

لە سەر بانگهێشتی ڕێکخراوی کورد و جوو لە بریتانیا هەیئەتێکی پارتی سەربەخۆیی کوردستان پێکهاتوو لە بەڕێزان ئاشتیاکۆ پوورکەریم سکرتێری گشتی و گۆران دەشتی ئەندامی دەفتەری سیاسیی پارتی بەشدارییان کرد.
سکرتێری گشتیی پارتی سەربەخۆیی کوردستان لە قسەکانیدا ئاماژەی بەوە کرد کە خواستی نەتەوەی کورد لە ڕۆژهەڵاتی کوردستان نە فیدراڵیە و نە کۆنفیدراڵی یان خودموختاری، بەڵکوو خواستی سەرەکی بریتیە لە وەدەرنانی داگیرکەری ئێرانی و بنیاتنانی وڵاتی سەربەخۆی کوردستان.

لە دڕێژە دا بەڕێز ئاشتیاکۆ ئاماژەی بەوە دا کە هەر کوردێک، یان هەر بەلووچ و عەڕەبێکی ئەحوازی و بە گشتی هەر غەیرە فارسێک خۆی بە شوناس و هۆویەتی جەعلی و دەستکردی ئێرانیەوە پێناسە بکا، ئەوە شوناسی خۆی لە بیرکردووە و حەزی بە کۆیلایەتی و مانەوە لە ژێر داگیرکاری دایە.
سکرتێری گشتیی پارتی سەربەخۆیی کوردستان گوتی: کورد نە ئێرانەیە، نە عێڕاقی، نە سووری و نە تورکیەیی، کورد، کوردستانیە و خاکەکەی لە لایەن ئەم چوار وڵاتەوە داگیرکراوە و خەباتی ئێمەش بۆ ئازادی و گەیشتنە بە سەروەریی سیاسی.

بەڕێز پوورکەریم لە وتەکانی دا ئاماژەی بەوە دا کە ئەو هێز و لایەنە کوردانەی، کوردستان بە ئێران گرێدەدەنەوە لە هەڵە دان و دەستەواژەی کوردستانی ئێران یان کوردی ئێرانی، هەڵەیەکی گەورەی سیاسی و شوناسی و نەتەوەییە.

هاوکات شاندێکی بەلووچستان راجی زرمبەش پێکهاتوو لە عەبدوڵڵا سیاهوویی سکرتێری گشتی و ئیسماعیل بەلووچ ئەندامی ڕێبەری و هەروەها شاندێکی بەرەی دێموکراتیکی خەڵکی ئەحواز پێکهاتوو لە عەلی ئەلشەمەری ئەلئەحوازی جێگری سکرتێری گشتی و دوکتور فەیسەل ئەحوازی وتە بێژی بەرەی دێموکراتیکی ئەحواز ، لە سەر بانگهێشتی پارتی سەربەخۆیی کوردستان لەم کۆبوونەوەیە دا بەشدارییان کرد و ڕا و بۆچوونی خۆیان لە پێوەندی بە پرسی نەتەوە خاک داگیرکراوەکان پێشکەش کرد.

پێویستە بگوترێ کە بەڕێزان  رزگار ئالانی نوێنەری حیزبی دێموکراتی کوردستانی ئێران، گوڵزار ئەلماسی ،نوێنەری کۆمەڵەی زەحمەتکیشانی کوردستان ، هادی ڕەسووڵزادە نوێنەری کۆمەڵەی شۆڕشگێڕی زەحمەتکیشانی کوردستانی ئێران ، ڕزگار ڕەوشەنی نوێنەری پارتی ژیانی ئازادی کوردستان و سەید وەفا ڕۆستەمزادە نوێنەری پارتی ئازادی کوردستان  وەک بەڕێوبەرانی سەرەکیی پانێلەکان قسەیان کرد و دیدگا و هەڵوێستەکانی حیزبەکانیان لەسەر دۆخی ئێران، کوردستان و گرنگیی هاوپەیمانیی حیزبە سیاسییەکانی کوردستانی ئێران خستنەڕوو.

نوێنەرانی حیزبە هاوپەیمانەکان لە وتارەکانیاندا جەختیان لەسەر گرنگیی هاوپەیمانیی نێوان حیزبەکانی کوردستان کردەوە و ئاماژەیان بەوە دا کە ئەم هاوپەیمانییە یەکەم هەنگاوی جددییە بۆ دروستکردنی دەنگ و هەڵوێستێکی یەکگرتوو لە ئاستی ئێران بە گشتی و کوردستان بە تایبەتی. هەروەها جەختیان لەسەر پێویستی یەکگرتوویی هێزە دیموکراتخوازەکان بۆ ڕووخاندنی ڕژێمی کۆماری ئیسلامی ئێران کردەوە.

لە پەرواێزی کۆبوونەوەکە دا هەیئەتی پارتی سەربەخۆیی کوردستان لە گەڵ نوێنەرانی سەرجەم لایەنە بەشداربووەکان قسەیان کرد و کۆمەڵێک باس و بابەتی پیوەندیدار بە کوردستان و ناوچەکەیان خستە بەر باس و لێکدانەوە.

1 لە 9