بەشداریی هەیئەتێکی پارتی سەربەخۆیی کوردستان لە کۆبوونەوەی پارلمانی بریتانیا

کوردناسیۆن: ڕۆژی چوارشەممە ١٧ی  پووشپەڕی ٢٧٢٦ی کوردی” ٨ی جولای ٢٠٢٦” لە پێوەندی بە نوێترین گۆڕانکارییەکانی بواری میدیا، حوکمڕانی و سیاسەت لە هەرێمی کوردستان لە لایەن ناوەندی پێشکەوتنی کوردی (Centre for Kurdish Progress)  لە یەکێک لە هۆڵەکانی پارلمانی بریتانیا کۆبوونەوەیەک بۆ  بەڕێز دڵێر عەبدولخالق، ڕۆژنامەنووس، مامۆستای زانکۆ و ئەندامی پێشووی پەرلەمانی کوردستان، ڕێکخرا.

بەڕێز دلێر عەبدولخالق کۆمەڵێک باس و بابەتی گرینگی لەو بارەوە هێنایە گۆڕێ.

شاندێکی پارتی سەربەخۆیی کوردستان بە بەشداریی بەڕیز ئاشتیاکۆ پوورکەریم، سکرتێری گشتی و بە هاوڕێیەتیی بەڕیز گۆران دەشتی ئەندامی دەفتەری سیاسیی پارتی سەربەخۆیی کوردستان لەم کۆبوونەوەیە دا بەشدار بوون.

سکرتێری گشتیی پارتی سەربەخۆیی کوردستان لە پێوەندی بە ڕۆڵی میدیا و سۆسیال میدیا بۆ چالاککردنی حکوومەت و دەسەڵاتدا قسەی کرد و هاوکات وتی: پێویستە لە هەرێمی کوردستان، بۆ هەندێک پرسی نەتەوەیی هێڵی سوور دابنرێ و ئیزن نەدرێ هێڵە سوورە نەتەوییەکان ببەزێندرێن یان بێڕێزی بە هێما و بەرژەوەندییە گشتیەکانی نەتەوەی کورد بکرێ و بەم چەشنە پیویستە هەندێک بەربەست لە بەردەم سۆسیال میدیا و میدیای ئازاد دابنرێ.

لە پەڕاوێزی کۆبوونەوەکە دا هەیئەتی پارتی سەربەخۆیی کوردستان لە گەڵ نوێنەرانی چەندین حیزب و لایەنی سیاسی، پارلمانتار و کەسایەتیی سیاسی دیدار و چاوپێکەوتنیان ئەنجام دا.

1 لە 16