پەیامی پارتی سەربەخۆیی کوردستان بە بۆنەی سی‌وحەوتەمین ساڵیادی تیرۆری شەهید دوکتور عەبدوڕەحمان قاسملوو

هاونیشتمانیانی خۆشەویست،
کۆمەڵانی خەڵکی تێکۆشەر و مافپەروەری کوردستان،

هەروەک ئاگادارن، ٣٧ ساڵ لەمەوبەر، شەهید دوکتور عەبدوڕەحمان قاسملوو، سکرتێری گشتیی حیزبی دێموکراتی کوردستانی ئێران، لەسەر مێزی وتووێژ و دانوستان، بە پلانێکی پێشوەختە و داڕێژراوی ڕژیمی داگیرکەر و دیکتاتۆری کۆماری ئیسلامیی ئێران، لە وڵاتی ئۆتریش تیرۆر کرا و گیانی خۆی لە پێناو ئازادی و مافە ڕەواکانی نەتەوەی کورد دا بەخت کرد.

شەهیدکردنی دوکتور قاسملوو لەسەر مێزی دانوستان، جارێکی دیکە بۆ جیهانی سەلماند کە نەتەوەی کورد نەتەوەیەکی ئاشتیخوازە و هەمیشە هەوڵی داوە بە بەکارهێنانی هەموو شێوازە ڕەواکانی خەبات، مافە نەتەوەیی و مرۆییەکانی خۆی بەدەست بهێنێت؛ بەڵام ڕژیمی ئێران، لەبری وەڵامدانەوەی سیاسی و مەدەنی، تیرۆر و توندوتیژیی کردووەتە ئامرازی سەرەکیی مامەڵەکردن لەگەڵ داواکارییە ڕەواکانی خەڵکی کوردستان.

تیرۆری دوکتور قاسملوو هەروەها وانەیەکی گەورەی مێژووییە بۆ هەموو جیهان. ئەگەر ئەمڕۆ دەوڵەتان و کۆمەڵگەی نێودەوڵەتی پێیان وایە کە دەتوانن تەنها لە ڕێگەی وتووێژ و سازانەوە لەگەڵ ئەم ڕژیمە بگەنە ڕێککەوتن، دەبێت لە ئەزموونی مێزی دانوستانی ڤییەن فێر ببن.

ڕژیمی کۆماری ئیسلامیی ئێران زۆرجار دانوستان و دیپلۆماسی نەک بۆ چارەسەرکردنی ناکۆکییەکان، بەڵکوو بۆ کڕینی کات، کەمکردنەوەی فشارە نێودەوڵەتییەکان، فریودانی بەرامبەر و گەیشتن بە ئامانجە سیاسی و ئەمنییەکانی خۆی بەکاردەهێنێت. بۆیە، هیچ وتووێژێک لەگەڵ ئەم ڕژیمە، بەبێ بەڵێنی نێودەوڵەتی، چاودێریی سەربەخۆ و میکانیزمی پابەندکردنی ڕژیم بە جێبەجێکردنی ڕێککەوتنەکان، نابێت بە نیشانەی نیازپاکیی ئەو ڕژیمە دابنرێت.

پارتی سەربەخۆیی کوردستان، وێڕای مەحکومکردنی هەموو کردارە تیرۆریستییەکانی ڕژیمی ئێران دژ بە ئازادیخوازان و شۆڕشگێڕانی نەتەوەکەمان، لە سی‌وحەوتەمین ساڵیادی تیرۆری شەهید دوکتور قاسملوودا، داوا لە هەموو هێز و لایەنە سیاسییەکانی ڕۆژهەڵاتی کوردستان دەکات، وانەی ئەم ڕۆژانە بکەنە هەوێنی ئاشتی، تەبایی، یەکڕیزی و هاوکاریی نەتەوەیی.

ئێمە پێمان وایە یەکڕیزیی هێزەکانی ڕۆژهەڵاتی کوردستان دەبێت لەسەر بنەمای چەمک و گوتاری نەتەوەیی، بەرژەوەندیی باڵای خەڵکی کوردستان و ئامانجی ڕزگاریی نیشتمان بنیات بنرێت؛ بۆ ئەوەی بتوانین گەلە چەوساوەکەمان لە ژێر ستەم و داگیرکاری ڕزگار بکەین، داگیرکەرانی کوردستان لە خاکەکەمان وەدەرنێین و بە درێژەدانی ڕێگە و ڕێبازی شەهیدەکانمان، خەونەکانیان بۆ ئازادی و سەربەخۆیی بەدی بهێنین.

هیوادارین هەموو هێز و لایەنە سیاسییەکان، بە دڵسۆزی، بەرپرسیارێتی و لەپێش چاوگرتنی هەستیاری و گرنگیی بارودۆخی سیاسیی ڕۆژهەڵاتی کوردستان، لە پێناو یەکڕیزی و یەکگوتاریی نەتەوەییدا هەنگاو بنێن و بە میکانیزمێکی گونجاو، چارەسەرێکی شیاو بۆ ناکۆکی، لێکدابڕان و دوورکەوتنەوەی نێوان هێزەکانی ڕۆژهەڵاتی کوردستان بدۆزنەوە.

یادی شەهید دوکتور قاسملوو و هەموو شەهیدانی ڕێگای ئازادیی کورد و کوردستان بەرز و بەڕێز بێت.

مەرگ و نەمان بۆ داگیرکەرانی کوردستان
سەرکەوێت خەباتی ڕزگاریخوازیی خەڵکی کوردستان

پارتی سەربەخۆیی کوردستان
٢١ی پووشپەڕی ٢٧٢٦ی کوردی
١٢ی جوولای ٢٠٢٦ی زایینی