پەیامی پارتی سەربەخۆیی کوردستان بە بۆنەی ساڵیادی کۆچی مێژوویی مەریوان

چل‌وحەوت ساڵ لەمەوبەر، لە ٣٠ی پووشپەڕی ساڵی ٢٦٧٩ی کوردی”٢١ی جولای ١٩٧٩ی زایینی، ١٣٥٨ی هەتاوی ” خەڵکی مەریوان یەکێک لە درەوشاوەترین و مێژوویی‌ترین نموونەکانی خۆڕاگریی مەدەنی، هاوپشتیی کۆمەڵایەتی و ئیرادەی سیاسیی نەتەوەی کوردیان تۆمار کرد.

لەو کاتەدا کە کۆماری ئیسلامیی تازەدامەزراو، بە ناردنی هێزە سەربازییەکان و هەوڵدان بۆ سەپاندنی دەسەڵاتی چەکدار بەسەر کوردستاندا، شاری مەریوانی خستبووە بەردەم مەترسیی شەڕ و کوشتار، خەڵکی ئەم شارە بڕیارێکی مێژووییان دا. ئەوان بۆ ڕێگریکردن لە شەڕی ناوشار، پاراستنی گیانی هاووڵاتیان و ناڕەزایەتی دەربڕین بەرامبەر بە میلیتاریزەکردنی کوردستان، ماڵ و حاڵی خۆیان بەجێهێشت و بە شێوەیەکی کۆمەڵایەتی لە شار کۆچیان کرد.

کۆچی مێژوویی مەریوان نە هەڵهاتن بوو لە مەیدانی خەبات و نە پاشەکشە بوو لەبەردەم هێزی دەسەڵاتدا؛ بەڵکوو شێوەیەکی هۆشیارانە، ڕێکخراو و بەرپرسیارانەی خۆڕاگریی جەماوەری بوو. خەڵکی مەریوان بە بەجێهێشتنی شار ڕایانگەیاند کە ئامادە نین ببنە قوربانیی شەڕێک کە دەسەڵاتی داگیرکەری ئێرانی بەسەریاندا دەسەپێنێت.

ئەوان نیشانیان دا کە شار تەنها کۆمەڵێک شەقام و خانوو نییە؛ شارێکی ڕاستەقینە بریتییە لە خەڵک، ئیرادەی هاوبەش و مافی ئەوان بۆ دیاریکردنی چارەنووسی خۆیان.

لە دروستبوون، ڕێبەریکردن و ڕێکخستنی ئەم جوڵانەوە مێژووییەدا، کاک فواد مستەفاسۆڵتانی ڕۆڵێکی دیار و لەبیرنەکراوی هەبوو. کاک فواد بە تێگەیشتن لە مەترسیی شەڕی ناوشار، لەبری ئەوەی خەڵک بخاتە ناو شەڕێکی نایەکسانەوە، ڕێگای خۆڕاگریی کۆمەڵایەتی و پاراستنی یەکگرتوویی کۆمەڵگەی هەڵبژارد.

ئەو باوەڕی وابوو کە خەبات تەنها لە بەرەنگاربوونەوەی چەکدارانەدا کورت نابێتەوە، بەڵکوو نەتەوەیەک دەتوانێت بە ڕێکخستن، هۆشیاری، هاوپشتی و یاخیبوونی مەدەنی، دەسەڵات ناچار بکات پاشەکشە بکات.

بەڵام کۆچی مێژوویی مەریوان تەنها هی تاکێک یان ڕەوتێکی سیاسی نییە. ئەم جوڵانەوەیە بەرهەمی ئیرادەی هاوبەشی خەڵک، ئەنجوومەنی شار، یەکێتیی جوتیاران، ژنان، گەنجان، مامۆستایان، کرێکاران، ڕووناکبیران، گوندنشینان و هەموو ئەو هێزانە بوو کە لەو ڕۆژە سەختانەدا چارەنووسی خۆیان بە یەکدییەوە گرێدا.

خەڵکی مەریوان دوای دەرچوون لە شار، لە کانی‌میران کۆمەڵگەیەکی کاتی، بەڵام ڕێکخراویان دروست کرد. ئەوان کۆمیتەکانی پاراستن، تەندروستی، پشتیوانی، دابینکردنی خۆراک و بەڕێوەبردنی کاروباری گشتییان پێکهێنا و سەلماندیان کە کۆمەڵگەی کوردستان توانای بەڕێوەبردنی خۆی هەیە.

کۆچی مێژوویی مەریوان لە کردەوەدا نموونەیەک بوو لە خۆڕێکخستن و دەسەڵاتی جەماوەری؛ ئەزموونێک کە نیشانی دا نەتەوەی کورد بۆ ژیانێکی ئازاد، بەرپرسیارانە و پشتبەستوو بە ئیرادەی خۆی، توانای سیاسی و کۆمەڵایەتیی پێویستی هەیە.

هاوپشتیی خەڵکی شارەکانی دیکەی کوردستان، بە تایبەتی ڕێپێوانە مێژووییەکەی خەڵکی سنە بەرەو مەریوان، ئەم جوڵانەوەیەی لە ناڕەزایەتییەکی ناوخۆییەوە گۆڕی بۆ هێمایەکی نەتەوەیی.

مەریوان لەو ڕۆژانەدا تەنیا نەبوو؛ کوردستان لە تەنیشت مەریوان وەستا و نیشانی دا کە ئازار و چارەنووسی هەر بەشێک لەم نیشتمانە، ئازار و چارەنووسی هەموو نەتەوەی کوردە.

پارتی سەربەخۆیی کوردستان، لە ساڵیادی ئەم ڕووداوە مێژووییەدا، بە ڕێزەوە یادی کاک فواد مستەفاسۆڵتانی، گیانبەختکردووانی ئەو سەردەمە، ڕێکخەرانی کۆچ و هەموو خەڵکی هۆشیار و خۆڕاگری مەریوان دەکاتەوە.

ئێمە کۆچی مێژوویی مەریوان بە بەشێکی گرنگ لە بیرەوەریی نەتەوەیی کوردستان و بە بەڵگەیەکی ڕوون لەسەر مافی نەتەوەی کورد بۆ ئازادی، دەسەڵاتی نەتەوەیی و دیاریکردنی چارەنووس دەزانین.

ئەزموونی مەریوان فێرمان دەکات کە هیچ دەسەڵاتێک ناتوانێت بە لشکرکێشی، سەرکوت، لەسێدارەدان و میلیتاریزەکردنی شارەکان، ئیرادەی نەتەوەیەک بۆ هەمیشە تێکبشکێنێت.

دەکرێت حکومەتێک شارێک داگیر بکات، ئەنجوومەنەکان هەڵبوەشێنێتەوە و چالاکانی سیاسی زیندانی یان لەسێدارە بدات؛ بەڵام ناتوانێت بیرۆکەی ئازادی لە یاد و هزری خەڵک بسڕێتەوە.

ئەمڕۆش ڕژیمی داگیرکەری ئێران، درێژە بە هەمان سیاسەتی میلیتاریزەکردنی کوردستان، سەرکوتی چالاکانی سیاسی و مەدەنی، لەسێدارەدانی گەنجان، بێبەشکردنی ئابووری و نکۆڵیکردن لە مافە نەتەوەییەکانی نەتەوەی کورد دەدات.

لەبەر ئەوە، پەیامی کۆچی مێژوویی مەریوان تەنیا ئی ڕابردوو نییە؛ ئەم پەیامە هێشتا زیندووە:

نەتەوەی کورد مافی هەیە بەبێ زاڵبوون، داگیرکاری، سەرکوت و دەستێوەردانی هێزە بێگانەکان، خۆی لەبارەی داهاتووی سیاسی و نەتەوەیی خۆیەوە بڕیار بدات.

پارتی سەربەخۆیی کوردستان جەخت لەوە دەکاتەوە کە ڕێزگرتنی ڕاستەقینە لە کۆچی مێژوویی مەریوان، تەنها بە بەڕێوەبردنی ڕێوڕەسم و یادی ساڵانە بەدی نایەت؛ بەڵکوو پێویستی بە بەردەوامبوونی خەباتێکی هۆشیارانە، یەکگرتوو و بەرپرسیارانە هەیە بۆ ڕزگاریی کوردستان و دامەزراندنی دەسەڵاتی نەتەوەیی کورد.

ئێمە بانگهێشتی هەموو هێز، پارت، ڕێکخراو، ڕووناکبیران، ژنان، گەنجان و دامەزراوە مەدەنییەکانی کوردستان دەکەین کە بە وەرگرتنی وانە لە هاوپشتیی مێژوویی خەڵکی مەریوان، ناکۆکییە لاوەکییەکان بخەنە لاوە و بۆ دابینکردنی ئازادی، سەربەخۆیی و مافی دیاریکردنی چارەنووسی نەتەوەی کورد، بەرەیەکی نەتەوەیی و گشتگیر پێکبهێنن.

کۆچی مێژوویی مەریوان سەلماندی کە هێزی ڕاستەقینە لە ئیرادەی ڕێکخراوی خەڵکدایە.

یادی کاک فواد مستەفاسۆڵتانی و هەموو تێکۆشەرانی ڕێگای ئازادی بەرز و بەڕێز و هەرمان بێت.

پارتی سەربەخۆیی کوردستان
٣٠ی پووشپەڕی ٢٧٢٦ی کوردی

٢١ی جوولای ٢٠٢٦ی زایینی