ئێوارەی ١٤ی خەرمانان، لە ڕێگای سنە–هەمەدان، تانکەرێکی هەڵگری سووتەمەنی دوای تێکچوونی کۆنترۆڵ خۆی بە چەند ماشێنێک دادا و تەقینەوە و ئاگرکەوتنەوەی گەورەی لێکەوتەوە. بەهۆی ئەم کارەساتە، ١١ کەس گیانیان لەدەست دا و ژمارەیەکی دیکەش بریندار بوون.
پارتی سەربەخۆیی کوردستان هاوخەمیی خۆی لەگەڵ بنەماڵە و کەسوکاری قوربانییەکان، خەڵکی سنە و هەموو نیشتمانەکەمان دەردەبڕێت و خۆی لەم خەم و پەژارە دا بە شەریک و بەشدار دەزانێ.
لەم ساتە پڕ لە خەمەدا، ئازاری بنەماڵە داغدارەکان تەنیا ئازاری ئەوان نییە؛ خەمێکە کە بەسەر هەموو کوردستاندا دابەش بووە.
ئەم کارەساتە هەروەها بیرخستنەوەیەکی تاڵە لەو ڕاستییەی کە سەلامەتی ژیان و هاتوچۆی خەڵکی کوردستان پێویستی بە ڕێگاوبانی ستاندارد و پارێزراو، چاودێریی جیددی و بەرپرسیارێتیی ڕوون هەیە.
ڕۆحی قوربانییەکان شاد و یادیان بەرز و بەڕێز بێت.
ئارامی و خۆڕاگری بۆ بنەماڵە و کەسوکاریان دەخوازین، و هیوای چاکبوونەوە و گەڕانەوەی تەندروستی بۆ هەموو برینداران.
پارتی سەربەخۆیی کوردستان
١٥ی خەرمانانی ٢٧٢٦
