لە چوارەمین ساڵوەگەڕی ڕاپەڕینی ژینا دا ، پارتی سەربەخۆیی کوردستان، پارتی سەربەستیی کوردستان و ڕێکخراوی خەباتی شۆڕشگێڕی کوردستان یادی ژینا و هەموو ئەو ژن و پیاوانە بەرز و بەڕێز ڕادەگرن کە لە خەبات بۆ ئازادی، کەرامەتی مرۆڤ و ڕزگاریی سیاسی ژیانیان بەخت کردووە.
شەهیدکرانی ژینا ئەمینی لە خەرمانانی ٢٧٢٢ ی کوردی تەنیا ڕووداوێکی تاکە کەسی نەبوو، بەڵکوو دەربڕینی قەیرانێکی قووڵی سیاسی و نەتەوەیی بوو کە نیشاندەر و درێژەی سیاسەتێکی کۆن و بەردەوامی ڕژیمە کە دەیان ساڵە لە کوردستان بەردەوامە.
لە کوردستانەوە «ژن، ژیان، ئازادی» بوو بە ناونیشانی ڕاپەڕینێک کە دواتر بۆ ناوچەکانی دیکەی غەیرە کوردیش پەلی هاویشت، گەشەی ستاند و پرسی ئازادیی ژن، سەروەریی سیاسی، سەربەخۆیی و مافی نەتەوەکان بۆ دیاریکردنی داهاتووی خۆیانی خستە ناوەندی گفتوگۆ و خواست و داواکاریی نەتەوە خاک داگیرکراوەکانی ناو جوغڕافیای دەستکرد و ساختەی ئێران.
ئێمە لەو باوەڕە داین کە داهاتووی ڕۆژهەڵاتی کوردستان نابێت دیسان بکەوێتە ژێر سایەی چارەسەرە کاتی و ناتەواوەکان.
خەباتی حەفتا، هەشتا ساڵەی خەڵکی ڕۆژهەڵات لە هەر چوارچێوەیەکی سیاسییدا بێت،نابێ بە فیڕۆ بدرێ و پێویستە مافی نەتەوەیی و ئیرادەی سیاسیی خەڵکی کوردستان بەڕوونی پارێزراو بێت. ئەزموونی ئەمڕۆی ڕۆژاوای کوردستان بۆ ئێمە پەیامێکی جیددییە کە هیچ دەستکەوتێکی سیاسی نابێت بەبێ گەرەنتیی ڕوونی حاکمییەت و مافی بڕیاردانی سیاسی و نەتەوەیی پشتگوێ بخرێت.
خوێنی ژینا و هەموو ئەو «ژینا»یانەی کە لە ڕێگای ئازادی گیانیان بەخت کرد، نابێت بەفیڕۆ بچێت. لە ڕوانگەی ئێمەوە، سەربەخۆیی، حاکمییەت، سەروەریی سیاسی و مافی دیاریکردنی چارەنووس بنەمای ڕزگاریی نەتەوەی کوردن لە ژێر دەسەڵاتی کۆماری ئیسلامیی ئێرانی داگیرکەر و لە هەر شێوەیەکی دیکەی سەپاندنی حاکمییەت بەسەر کوردستاندا.
گۆڕانکارییە خێرا و بنەڕەتییەکانی ڕۆژهەڵاتی ناوەڕاست دەتوانن، ئەگەر بە هۆشیاری و خوێندنەوەی دروستی سیاسی مامەڵەیان لەگەڵ بکرێت، دەرفەتێکی نوێ بۆ نەتەوە بێدەوڵەتەکان و ئەو گەلانە دروست بکەن کە خاک و ئیرادەی سیاسییان لە ژێر دەسەڵات و داگیرکاریی دەوڵەتانی ناوچەدا ماوەتەوە.
لە وەها قۆناغێکدا، هاوئاهەنگی و یەکڕیزیی نێوان هێز و ڕەوتە سیاسییە کورد و کوردستانیەکان گرنگتر لە هەر کاتێکی دیکەیە، چونکە دابەشبوون دەتوانێت دەرفەتە مێژووییەکان لاواز بکات و یەکڕیزی دەتوانێت توانای سیاسیی کورد لە بڕیاردانە ناوچەیی و نێودەوڵەتییەکاندا بەرز بکاتەوە.
ئێمە باوەڕمان وایە هیچ داهاتوویەکی دادپەروەرانە بەبێ داننان بە ئیرادەی سیاسیی خەڵکی کوردستان و مافی ئەوان بۆ دیاریکردنی داهاتووی خۆیان دروست نابێت.
پارتی سەربەخۆیی کوردستان
ڕێکخراوی خەباتی شۆڕشگێڕی کوردستان
پارتی سەربەستیی کوردستان
٢٣ی خەرمانانی ٢٧٢٦ی کوردی
١٤ی سێپتامبری ٢٠٢٦ی زایینی
https://addlinks.pro/QeLud