ڕیفراندۆم، ئیرادەی نەتەوەیەکی خاک‌داگیرکراوە لە پێناو سەربەخۆیی خاک و نیشتمانەکەی؛ خواست و ویستی ناخی هەر تاکێکی ئەم نیشتمانە لە چوارمێخە دراوەیە. ئیرادەیەکە بۆ دامەزراندنی دەوڵەتی سەربەخۆی کوردستان لە خاکی پیرۆزی باو و باپیرانمان؛ ئیرادەیەک بۆ کۆتاییهێنان بە داگیرکاری؛ ئیرادەیەک بۆ سڕینەوەی فرمێسکی دایکانی جەرگ‌سووتاو؛ ئیرادەیەک بۆ گەیشتن بە ئاواتی دەیان و سەدان هەزار گەنجی گیانبەختکردوو لە مێژووی خەباتی ڕزگاریخوازی نەتەوەکەمان.
ئیرادەیەکە بۆ ژیانەوەی ڕۆحی ١٨٢ هەزار ئەنفالکراوی دەستی داگیرکەران و قوربانیانی دەیان کارەسات و کۆمەڵکوژیی نەتەوەکەمان لە خاکی پیرۆزی کوردستان. ئیرادەیەکە بۆ کۆتاییهێنان بە تاڵانیی خاک و سروشت و ژینگە و سامانی نەتەوەیەک؛ ئیرادەیەک کە ترپەی دڵی مژدەی ڕزگاری و سەربەخۆیی بوو.
بەداخەوە، ئەو ئیرادە نەتەوەییە لە دوو لاوە پشتی تێکرا و پاشقولی لێ درا. لەلایەکەوە بووە قوربانی بەرژەوەندیی زلهێزانی لانکەی دیموکراسی و مافی مرۆڤ، کە لە هەمان کاتدا خاوەن‌بڕیار بوون، لەگەڵ دڕندەیی داگیرکەرانی کوردستان.
لەلایەکی تریشەوە بووە قوربانی سەرکردایەتییەکی لاواز لە هەڵوێست و بڕیاری خۆمان؛ سەرکردایەتییەک کە تا ئێستاشی پێوە بێت نە ویستوویەتی لە خواستی نەتەوەکەی تێبگات، نە پرۆژەیەکی ڕوونی بۆ ڕزگاری نیشتمانەکەی کردووەتە ئامانج و نە توانیویەتی بەرژەوەندیی نەتەوەیی بخاتە لوتکەی بەرژەوەندییەکانی.
هەر ئەوەش وای کردووە نەتوانین بەرژەوەندییەکانمان لەگەڵ بەرژەوەندییەکانی هاوپەیمانەکانمان و زلهێزانی خاوەن‌بڕیار هاوتەریب بکەین؛ سەرمان لە خۆمان و دۆستانیشمان شێواندووە. هەموو کاتێکیش زۆر بە سانایی هەموو تاوانەکان دەخەینە پاڵ دۆستان و هاوپەیمانەکانمان و خۆمان لە هەموو هەڵە و تاوانێک بێبەری دەکەین. شکستەکانمان بە ناوی سەرکەوتن بە خۆمان دەفرۆشینەوە و مێژوومان دووبارە و چەندبارە دەبێتەوە.
ڕیفراندۆم ڕووداوێکی گەورەی مێژوویی بوو، بەڵام بەداخەوە هیچکات لەلایەن ناوەندە زانستییەکان، زانکۆکان و ناوەندە ڕامیارییەکانی کوردستانەوە خەسارناسییەکی شایانی ئەم ڕووداوە نەکرا و لێکدانەوەیەکی هەمەلایەنەی بۆ نەکرا؛ لێکدانەوەیەک کە بتوانێت ببێتە دەرسێک بۆ داهاتوو، بۆ ئەوەی وەک هەمیشە هەڵە مێژووییەکانمان بە سانایی دووبارە نەکەینەوە و دەرفەتە مێژووییەکان لە دەستمان نەفڕێن.
هەموو ساڵێک کە یادی ئەو ئیرادە نەتەوەییە دەکەمەوە، گەز گەز باڵا دەکەم، شانازی بە نەتەوەکەمەوە دەکەم و شاگەشکە دەبم.
بەڵام هەرکات بیر لە ناکارامەیی و هەڵە مێژووییەکانی خۆشمان دەکەمەوە، دڵم بە نەتەوەکەم دەسووتێت؛ نەتەوەیەک کە لەگەڵ ئەو هەموو خوێن و خەبات و ئیرادەیەدا، دیسانەوە هەر دەبێت خەون بەو ڕۆژەوە ببینێت کە ئاڵاکەی، وەک ئاڵای هەموو نەتەوەکانی سەر ئەم گۆی زەوییە، ڕۆژێک لە پەنای ئاڵای ئەواندا و لە هەموو ناوەندەکانی بڕیاردا بشەکێتەوە.
٢٥ی سپتامبر، یادی ڕیفراندۆمە مەزنەکەی کوردستان، لام پیرۆزە و بە شانازییەوە یادی دەکەمەوە.
بەڵێ، بەڵێ، بەڵێ؛ هەزاران جار بەڵێ بۆ سەربەخۆیی و سەروەریی خاکی کوردستان و بۆ دەوڵەتی سەربەخۆی کوردستان.
سەلاح سوڵتانپەنا
٢٥ی سپتەمبری ٢٠٢٦
https://addlinks.pro/3P531